Осиё чемпионати(U-22): Ўзбекистон чорак финалга чиқолмади

Уммонда бўлиб ўтган қитъа биринчилиги гуруҳ босқич саралаш беллашувларини бир ғалаба ва икки мағлубият билан якунлаган ўзбекистонлик ёшлар ортга қайтадиган бўлишди.

Пайшанба куни Саудия Арабистонига қарши ўйиндаги мағлубияти жамоанинг 22 ёшлилар ўртасидаги илк Осиё чемпионатининг ярим финалига чиқиш режасини чиппакка чиқарди.

Ўзбекистон ёшлар миллий терма жамоаси чорак финалга чиқиши учун дуранг натижа ҳам кифоя қиладиган ҳал қилувчи якуний учрашувини Саудия Арабистонига 0:1 ҳисобида бой берди.

Ўзбекистоннинг сўнгги мағлубияти ортидан, "Д" гуруҳидан чорак финалга 3-тур учрашувида Хитойни ҳам мағлуб этган Ироқ ва Саудия Арабистони чиқадиган бўлишди.

Пайшанба куни ўз поёнига етган гуруҳ босқич саралаш беллашувлари ортидан яна Иордания, Жанубий Корея, Сурия, БАА, Австралия ва Япония бу каби ҳуқуқни қўлга киритишди.

Айни ўринда таъкидлаш жоиз, Ироқ бу босқичда барча учрашувларини ғалаба билан якунлаб, максимум 9 очко билан чорак финалга чиққан ягона жамоа бўлди.

22 ёшлилар ўртасида Осиё чемпионатининг чорак финал беллашувлари эса, 19 ва 20 январ кунлари бўлиб ўтади.

Айни ўринда шуни ҳам таъкидлаш керакки, бунгача турли ёш тоифасида Ўзбекистон миллий терма жамоалари Осиё чемпионатларида муваффақиятли иштирок этиб келишган.

Жумладан, Ўзбекистон ўсмирлар миллий терма жамоаси Осиё чемпиони бўлиб, ёшлар терма жамоаси эса, ярим финалчиси сифатида ўтган йилги жаҳон биринчиликларида иштирок этиш ҳуқуқини қўлга киритишган.

Айни ўринда эслатиб ўтиш жоиз, 22 ёшда Осиё чемпионлиги учун курашини бошлаган таркибнинг ярмидан кўпроғи ўтган йил ёшлар ўртасида Туркияда бўлиб ўтган жаҳон чемпионати иштирокчилари эди.

Улар эса, кетма-кет тарихий натижа қайд этиб, илк бор жаҳон биринчилигининг чорак финалига чиқишга муваффақ бўлишган.

Тошкентдан таниқли футбол эксперти Ахбор Имомхўжаев биз билан суҳбатида жамоанинг муваффақиятсизлигини кўнгилдагидек тайёргарлик кўришга етарлича вақт бўлмагани билан изоҳлади.

"Энг яхши ўйинчилар саралаб олинганди. Лекин тайёргарлик кўришга ҳеч қандай вақт бўлгани йўқ. Шунга қарамасдан, бу ўйиндан фожеа ясаш керак эмас. Ҳали, Худо хоҳласа, бу болаларимизнинг олдида катта истиқбол турибди", - дейди у киши.

Ўзбекистонлик футбол экспертининг таъкидлашича, миллий терма жамоанинг муваффақиятсизлигида Бош мураббийи айбдор, деган фикрларга умуман қўшилмайди.

"Мен бу фикрга умуман қўшилмайман. Мураббий жамоа билан ишлай олмади, мураббий жамоани мусобақага тайёрлай олмади, деган гапларни мен кун тартибидан чиқариб ташлаган бўлардим. Шуҳрат Мақсудов футболдаги катта одам...", - дейди Ахбор ака.

11 январ куни старт олган Осиё чемпионати эса, икки ҳафта давом этади ва ғолиб 26 январ куни аниқланади.