Миржалол Қосимов: 'Парвознинг кечиккани ўйинимизга таъсир қилиши керак эмас'

Ўзбекистон миллий терма жамоаси Бош мураббийи Пекиндан туриб Би-би-си Ўзбек Хизматига берган суҳбатида ёмон об-ҳаво туфайли Хитойдан Сеулга парвозларининг кечикканига ана шундай муносабат билдирди:

2014 йилги жаҳон чемпионатининг финал босқичига чиқиш учун ўз курашини давом эттираётган Ўзбекистон миллий терма жамоаси бир кун кечикиб, яъни 9 июн куни Жанубий Кореяга етиб бора олди.

Ўз гуруҳидан 2 та йўлланмадан бирига даъвогарлик қилаётган ўзбекистонлик футболчилар 11 июн куни Жанубий Кореяга қарши ҳал қилувчи сўнгги икки учрашувларидан бирини ўтказишади.

Жамоанинг Сеулга Хитойдаги халқаро ўртоқлик учрашуви ортидан 7 июн куни етиб бориши режаланган, аммо ёмон об-ҳаво туфайли парвозлари бир кунга кечикиб кетганди.

Жанубий Кореяга қарши ўйин Ўзбекистон миллий терма жамоасининг 2014 йилги жаҳон чемпионатига йўлланмани қўлга киритишида муҳим аҳамиятга эга.

Жамоа ҳалича ўз тарихида бу каби шарафга нойил бўлмаган.

Аммо ўзбекистонлик футболчилар сўнгги босқич саралаш беллашувларининг Жанубий Корея ва Қатарга қарши қолган икки учрашувида 4 очко қозонишса, бу гал ўз мақсадларига эришишади.

Ўзбекистон миллий терма жамоаси Жанубий Кореяга қарши муҳим учрашуви олдидан 6 июн куни Хитойда халқаро ўртоқлик учрашуви ўтказганди.

Мезбон Хитойга қарши Хоххот шаҳрида бўлиб ўтган ўйин 1:2 ҳисобида ўзбекистонлик футболчиларнинг ғалабаси билан якунланди.

Ушбу ўртоқлик учрашуви ортидан, Ўзбекистон миллий терма жамоасининг 7 июн куни Сеулга етиб бориши кутилганди.

Аммо, аён бўлишича, жамоа ўша куни тушдан сўнг Хаххотдан Пекинга учган, аммо ёмон об-ҳаво туфайли, Сеулга режаланган кечқурунги парвозлари кечиктирилган.

Ўзбекистон миллий терма жамоаси Бош мураббийи Миржалол Қосимовнинг Пекиндан туриб Би-би-си Ўзбек Хизматига айтишича, бугун - 8 июн куни кечқурун Сеулга учиб кетишни режалашмоқда.

Унинг сўзларига кўра, парвозларининг кечиккани сабаб, бугунги машғулотларини ҳам Пекиннинг ўзида ўтказишга мажбур бўлишган.

Объектив омил

Ўзбекистон миллий терма жамоаси Бош мураббийи ёмон об-ҳаво туфайли парвозларининг кечикканини назарда тутиб, "айб ўзларида эмаслиги, буни тўғри тушуниш лозимлиги, олдинда тарихий учрашув турганлиги боис, мавжуд ҳолат ўйинларига таъсир қилиши керак эмаслиги, иложи борича бунга эътибор бермасликнинг муҳим"лигини урғулайди.

"Нима бўлган тақдирда ҳам, бунга унақа эътибор бермасликка ҳаракат қилиш керак. Нимагаки, бу босқичга қадар осонлик билан етиб келганимиз йўқ. Бу ўйинда майдонга бир жон, бир тан бўлиб чиқиб, ҳаракат қилишимиз лозим", дейди Миржалол Қосимов.

Ўзбекистон миллий терма жамоаси Бош мураббийи мавжуд ҳолатга қарамай, Жанубий Кореяга қарши ўйинга лозим даражада ҳозирлик кўриб, йўлланманинг тақдирини ўша ернинг ўзида ҳал қилишга ҳаракат қилишларини ҳам айтади.

"Энди, ўзингиз биласиз, бу - футбол. Натижани олдиндан айтиб бўлмайди. Лекин мен йигитларга ишонаман, улар майдонга чиққандан кейин жон-жаҳдлари билан ҳаракат қилишади ва ўз мақсадимизга, иложи борича, Жанубий Кореяда етишмоқчимиз", дейди у.

Ўзбекистон миллий терма жамоаси келаси икки ҳафта ичида ўз тарихида илк бор жаҳон чемпионатининг финал босқич беллашувларига чиқишини кафолатлаши мумкин бўлган сўнгги икки учрашувини ўтказади.

Сўнгги босқич саралаш беллашувларининг сўнгги икки тур учрашуви доирасида 11 июн куни сафарда Жанубий Кореяга қарши майдонга тушади. 18 июн куни эса, Тошкентда ўз майдонида Қатарни қабул қилади.

Имконият

Саралаш босқич беллашувларини муваффақиятли давом эттираётган Ўзбекистон жорий пайтда Осиё қитъасидан 2014 йилги жаҳон чемпионатига 4.5 та йўлланмадан биттасини қўлга киритишга даъво қилаётган ягона Марказий Осиё давлати бўлиб турибди.

Шу ҳафта сешанба куни "В" гуруҳида тўп сураётган тўрт карра Осиё чемпиони Япония қитъадан 2014 йилги Жаҳон чемпионатига муддатидан илгари йўлланма олган биринчи жамоа бўлди.

"А" гуруҳида эса, сўнгги босқич саралаш беллашувларининг 6-тур учрашувлари ортидан, 11 тадан очко билан Жанубий Корея ва Ўзбекистон биринчи ва иккинчи ўринларни бўлашиб туришибди.

10 очко тўплашга муваффақ бўлган Эрон эса, фақат 1 очко фарқ билан бу икки миллий терма жамоадан ортда бормоқда.

Тўртинчи ўринда бораётган Қатар 7 очко тўплашга муваффақ бўлган бўлса, Ливан 5 очко билан гуруҳда энг сўнгги ўринни эгаллаб турибди.

Футбол мутахассисларига кўра, Жанубий Корея 2014 йилги жаҳон чемпионатига иккита йўлланмадан бирини қўлга киритишда асосий даъвогарлардан бири бўлса, иккинчи йўлланма учун кураш Ўзбекистон ва Эрон орасида кечади.