Ҳижоби сабаб жаҳон чемпиони очколари инобатга олинмади
Ҳижобсиз чиқишга рози бўлмагани учун туркиялик Зайнаб Оқюзнинг ушу бўйича Оврўпо чемпионатида қайд этган натижалари инобатга олинмади.
Хабарларга кўра, аввалига 13 ёшли мусулмон спортчисининг айнан ҳижоби сабаб биринчиликда иштирок этишига умуман рухсат этилмаган.
Аммо Туркия Ушу Федерациясининг шикояти ортидан, Зайнаб Оқюзга қўйилган тақиқ бекор қилинган.
Ҳакамларнинг қарори ортидан, Зайнаб энди шикоят аризаси билан Инсон ҳуқуқларини ҳимоя этиш бўйича Оврўпо маҳкамасига шикоят аризаси билан чиқмоқчи.
Туркиялик ёш спортчининг айтишича, Оврўпо Ушу Федерацияси томонидан унинг инсоний ҳуқуқлари поймол этилган.
Туркия парламенти қошидаги инсон ҳуқуқларини назорат этиш қўмитаси ва парламент спикери муовини ҳам Зайнаб Оқюзнинг ҳуқуқлари бузилган, деган хулосага келишган.
“Оврўпонинг қоқ марказида инсон ҳақлари топталаётганини кўришнинг ўзи жуда қизиқ. Яна Оврўпо Иттифоқининг қанчалар демократ, эркин ва мутаассибликдан холи экани ҳақида бонг уришади. Бошқаларни ҳукм этгандан кўра, оврўполик сиёсатчилар ўз давлатларини ривожлантириш билан шуғуллансалар, яхшироқ бўларди”, деб айтган Туркия парламенти спикери муовини Невзат Покдил.
Ушу бўйича жаҳон чемпиони бўлган Зайнаб ўзи билан юз берган сўнгги ҳодисадан сўнг қайтиб Оврўпо чемпионатида иштирок этмаслигини ҳам баён қилган.
Туркиялик спорт масъулларига кўра, бунгача ҳеч бир халқаро турнирда Зайнабнинг ҳижоби юзасидан бу каби ҳолатга тушишмаган.
Бу йилги биринчилик эса, ўтган ҳафта Руминиянинг Бухарест шаҳрида бўлиб ўтганди.
Мусобақаларда дунёнинг 24 давлатидан 700 дан ортиқ спортчи иштирок этишганди.
Хабарларга кўра, ғолибларга медалларни топшириш жараёнида Туркия миллий терма жамоаси аъзолари Исроил мадҳиясига ҳурмат кўрсатиб, ўринларидан туришмаган.
Мавжуд ҳолат ҳам анчагина гап-сўзларга сабаб бўлгани айтилмоқда.
Спорт ва ҳижоб
Спорт оламида муслима спортчиларнинг ҳижоблари билан боғлиқ можаролар илк бор кузатилаётгани йўқ.
Ўтган йил Бирлашган Миллатлар Ташкилоти, Африка Футбол Конфедерацияси ва Осиё Футбол Конфедерациясининг такрорий уринишлари ортидан, ФИФА муслима футболчиларнинг ҳижобларига қўйилган тақиқни бекор қилишга мажбур бўлганди.
2007 йилдан буён жароҳат олишлари хавфи борлиги айтилиб, ФИФА (Халқаро Футбол Уюшмаси) томонидан муслима футболчиларнинг ҳижобда майдонга тушишлари ман этиб қўйилганди.
Ушбу амал танқидчиларига кўра, мазкур тақиқ дунёдаги энг оммабоп спорт ўйинида нотенгликнинг олий даражада тарғиб этилишига йўл очган.
Тақиқнинг бекор қилиниши эса, минглаб муслима футболчиларнинг яна катта майдонларда тўп суришларига имкон берган.
Ҳозир енгил атлетика, регби, қиличбозлик, воллейбол ва таэквондо мусобақаларида спортчиларнинг ҳижобда бўлишларига рухсат берилади.
