Афғонистон: Панжшер водийсида қаттиқ жанглар бораяпти Panjsher Afg‘oniston Tolibon dunyo yangiliklar
Сурат манбаси, AFP
Афғонистон пойтахти Кобул шимолидаги Панжшер водийсидан олинаётган хабарларга кўра, бутун мамлакатни босиб олган Толибон жангчилари билан тоғли водийни ҳимоя қилаётган Миллий Қаршилик Жабҳаси қуроллилари ўртасида қаттиқ жанглар кечмоқда.
Сентябрь ойининг бошидан буён Толибон ҳам, қаршилик томони ҳам ўзларининг душманларига катта талофатлар етказганларини даъво қилишаяпти.
Толибонга кўра, жабҳа "катта йўқотишлар" берган, ўзлари айрим ҳудудларни қаршилик ҳаракатидан тортиб олган.
Аммо Миллий Қаршилик Жабҳаси водийга кирадиган ҳамма жойларни ўзлари назорат қилаётганини, Толибон эса юзлаб қуроллиларини йўқотганини айтган.
Сурат манбаси, AFP
Бундан олдин Толибон Панжшердагиларни таслим бўлишга чақирганди.
Ўртада кечган музокаралар бесамар бўлган, томонлар музокаралар муваффақиятсизлигида рақибларини айбладилар.
Миллий Қаршилик Жабҳаси сафларида бир неча минг ҳудудий жангарилар ҳамда Афғон ҳукумати армиясининг собиқ ҳарбийлари жамланган деб кўрилади.
Айрим маълумотларга кўра, қаршилик ҳаракати аъзолари сони 15 мингни ташкил этади.
- Афғонистон: Толибон ҳамон ололмаган сўнгги минтақа - Панжшер қандай водий?
- Афғонистон: Панжшерда Толибонга қарши уришиш учун минглаб одамлар йиғилмоқдами?
- Толибон учун Афғонистон шимолини тўлиқ олиш нега муҳим?
- Дўстумнинг ўғли қутқарилди, Мозори Шариф нисбатан тинч, Толибон Қандаҳорни ҳам олди
- Шимолий Афғонистон ва ўзбеклар: Маршал Дўстум қайтишидан кун ўтиб, Толибон унинг она шаҳрига бостириб кирди
Сурат манбаси, Reuters
Панжшердаги қаршилик ҳаракатига таниқли мужоҳиддин қўмондони Аҳмад Шоҳ Масъуднинг 32 ёшли ўғли Аҳмад Масъуд бошчилик қилмоқда.
Аҳмад Шоҳ Масъуд Совет қўшинлари баробарида Толибонга ҳам бас кела олгани билан танилган, аммо 2001 йили "Ал-Қоида"нинг худкуш ҳужумчиси томонидан ўлдирилган.
Панжшер Афғонистонда ўзининг исломий амирлигини эълон қилган 1996 йилда ҳам Толибоннинг қўлига ўтмаган, уларнинг назоратидан ташқарида бўлган.
Аммо, айрим экспертларга кўра, толиблар ўша йиллардан яхши сабоқ чиқаришган ва бу гал водийни ҳар томондан қамал қилишган, уларнинг таъминот йўлларини кесиб қўйишган.
Қаршилик тимсоли
Панжшер Афғонистонда қаршилик тимсолига айланган водий бўлади.
Ўнлаб йиллар давомида бу водийни бирор бир босқинчи, ишғолчи куч босиб ололмаган.
Панжшер пойтахт Кобулдан бор-йўғи 50 чақиримча узоқликда жойлашган.
Ҳозир водийни минглаб Толибон жангариси қуршаб олган.
Толибон шу бир-икки кун ичида Афғонистонда ўзининг янги ҳукуматини эълон қилиш режасида.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
