Қирғизистон собиқ президенти Атамбаев икки ой ҳибсда қолади
Сурат манбаси, VYACHESLAV OSELEDKO/Getty Images
- Author, Шоҳруҳ Соипов
- Role, Мустақил журналист, Бишкек
Қирғизистонни олти йил бошқарган собиқ президент Алмазбек Атамбаевнинг қамоқдаги муддати суд қарори билан 26-октябргача узайтирилди.
20 августда Бишкекнинг Биринчи май туман суди ҳаками Миллий Ҳавфсизлик Давлат Қўмитаси биносида Атамбаев ишини олиб бораётган терговчи аризасини кўриб чиққан ва уни қаноатлантирган.
Судда собиқ президент ҳам иштирок этган, бироқ у бир оғиз сўз ҳам айтмаган. Унинг ҳимоячиси Замир Жўшев суд жараёнини махсус хизмат биносида ўтказилгани ноқонуний эканини айтиб, бу бўйича юқори инстанцияларга мурожат қилишини билдирди.
Қирғизистонни 2011-2017 йиллар оралиғида бошқарган Алмазбек Атамбаев, жорий йилнинг 8-августида Бишкек яқинидаги Қўй-Тош қишлоғидаги уйида қўлга олиниб, суд қарори билан 26-августгача тергов қамоқхонасига киргизилган эди.
Унгача Бош прокуратура собиқ давлат раҳбарини қатор оғир жиноятларни содир этганликда гумонлаб, уч маротаба сўроққа чақирган, бироқ Атамбаев барчасини рад этган. Шундан сўнг уни ҳибсга олиш махсус амалиёти амалга оширилган.
Икки кун давом этган тўқнашувлар натижасида бир нафар махсус хизмат ходими вафот этиб, юзга яқин фуқароларнинг жабрланиши ортидан Атамбаев таслим бўлган.
Шунингдек, Бишкек шаҳар Биринчи май туман суди, Алмазбек Атамбаевнинг қўлга олинишидаги қонунбузарликлар юзасидан ҳимоячиларнинг аризасини ҳам кўриб чиққан ва уни қаноатлантирмаган.
Суд ҳакамининг таъкидлашича, собиқ президент дастлаб қўлга олинмаган, уни мажбурлаб тергов идорасига олиб келишган.
"Мажбурий олиб келиш - бу қонунда кўзда тутилган чора ва четдан кузатганда у қўлга олиш ёки эркинликни вақтинчалик чеклашга ўхшайди", - дейди ҳакам Абуразақ Бўрўмбаев.
Ҳимоячилар суд ҳаками уларнинг илтимосларини инобатга олмаганини айтади.
"Биз Алмазбек Атамбаевни ушлаб келган одамларни судга чақиришни илтимос қилдик. Ҳакам рад этди. Мазкур қарордан норозимиз. Бу бўйича ҳам албатта юқори инстанцияларга мурожат қиламиз", - деди ҳимоячи Сергей Слесарев.
Алмазбек Атамбаев аввалига 2013-йили Қирғизистон қамоғидан жиноят оламида таниқли Азиз Батукаевни ноқонуний бўшатилиб зудлик билан давлатдан чиқариб юборилиши бўйича айбланган бўлса, кейинчалик унга қўйилаётган айбловлар сони ўндан ошган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: @bbcuzbek
