یمن کے جلاوطن صدر کی وطن واپسی
،تصویر کا ذریعہ
یمن کے سرکاری حکام کا کہنا ہے جلاوطنی اختیار کرنے والے یمنی صدر عبد ربہ منصور ہادی عدن واپس لوٹ آئے ہیں جہاں وہ باغیوں کے زیرِ تسلط علاقے تعز میں کیے جانے والے نئے حملے کی نگرانی کریں گے۔
ابھی یہ واضح نہیں ہے کہ صدر ہادی کتنے دن تک ملک میں قیام کرنے کا ارادہ رکھتے ہیں۔ وہ اس سے قبل ستمبر میں بھی عدن واپس لوٹ آئے تھے۔
خیال رہے کہ یمنی صدر رواں سال مارچ کے اواخر میں ملک چھوڑ کر ہمسایہ ملک سعودی عرب چلے گئے تھے۔ جس کے بعد وہاں موجود حوثی باغیوں کے خلاف جاری جنگ میں سعودی حکومت نے صدر ہادی کی فوج کی مدد کے لیے فضائی کارروائی کا آغاز کیا تھا۔ سعودی فوج نے بعد ازاں وہاں اپنی زمینی کارروائی کا آغاز کیا تھا۔
اعداد و شمار کے مطابق آٹھ ماہ سے جاری اس جنگ میں اب تک 5600 افراد ہلاک ہو چکے ہیں۔
End of سب سے زیادہ پڑھی جانے والی
حکام کا کہنا ہے کہ یمن کے شہر عدن کے ضلع کریتر میں واقع صدارتی محل ماشق میں قیام کریں گے۔
وہ ایک ایسے وقت میں ملک واپس لوٹے ہیں جب یہ خبر موصول ہوئی تھی کہ ان کی حامی فوجوں نے تعز کے اردگرد کے جنوب مغربی علاقوں میں پیش قدمی کی ہے۔
خبر رساں ادارے روئٹرز نے طبی ذرائع کے حوالے سے خبر دی ہے کہ گذشتہ روز باغیوں اور یمنی فوج کے درمیان جاری لڑائی میں دونوں جانب 45 جنگجو ہلاک ہوئے۔
،تصویر کا ذریعہReuters
مقامی رہائشیوں کا کہنا ہے کہ اتحادی فوجوں کے جنگی جہازوں نے حوثی باغیوں کے ٹھکانوں پر متعدد بار حملے کیے۔
اقوامِ متحدہ یمن جنگ روکنے کے لیے ثالثی کا کردار ادا کر رہی ہے۔ اگرچہ اس عرصے میں چند بار عارضی جنگ بندی تو ہوئی تاہم مکمل کامیابی نہیں مل سکی۔ اس سلسلے میں تازہ مذاکرات رواں ماہ کے آخر میں ہو رہے ہیں۔
