یورپ میں پناہ کے متلاشیوں کو نئے راستوں کی تلاش

کروئیشیا میں پھنسے ہوئے ہزاروں پناہ گزین سلوونیا اور ہنگری کی طرف سے سرحدیں بند کیے جانے کی وجہ سے شمالی یورپ میں آگے بڑھنے کے لیے نئے راستوں کی تلاش کر رہے ہیں۔

سلوونیا کی پولیس نے گذشتہ رات پناہ گزینوں کےاس گروہ پر مرچوں کا چھڑکاؤ کیا جو کروئیشیا سےسلوونیا میں داخل ہونے کی کوشش کر رہا تھا۔

ادھر ہنگری نے کروئیشیا پر الزام عائد کیا ہے کہ وہ اپنے ملک میں پناہ گزینوں کو رجسٹر کیے بغیر دوسرے میں بھیجنے کے عمل سے پناہ گزینوں سے متعلق عالمی قانون کی خلاف ورزی کر رہا ہے۔

ہنگری میں داخلے پر جھڑپیں

جرمنی باڈر کنٹرول سروع کرے گا

خیال رہے کہ یورپی یونین کے ریگولیشنز کے مطابق تارکینِ وطن جس بھی ممبر ملک میں جائے اسے رجسٹریشن کروانی لازمی ہوگی اور وہ اسی ملک میں پناہ کی درخواست بھی کرے گا۔تاہم زمینی صورتحال اس سے مختلف ہے کیونکہ تارکینِ وطن کی اکثریت جرمنی اور آسٹریا جانے کی خواہش رکھتی ہے۔

یورپی یونین جو پناہ گزینوں کے مسئلے سے نمٹنے کے معاملے پر بٹی ہوئی ہے وہ اگلے ہفتے صورتحال پر غور کے لیےاجلاس منعقد کر رہی ہے۔

جمعے اور سنیچر کی درمیان شب بلقان کے راستے شمالی یورپ میں داخل ہونے کے متمنی ہزاروں پناہ گزینوں نے رات ریلوے سٹیشنوں یا سڑک کے گرد گزاری۔ ترکی پولیس نےگذشتہ رات سینکڑوں افراد کو یونان کی سرحد عبور کرنے سے روکا تو انھیں شمال مغربی ترکی کے شہر ایڈرائن کی موٹروے کے گرد رات گزارنا پڑی۔

جوں جوں یوریی ممالک اپنی سرحدوں پرحفاظتی انتظامات کو بڑھا رہے ہیں، پناہ گزین بڑی سڑکوں کی بجائے مکئی کے کھیتوں کےراستوں پر چل کر منزل کی طرف بڑھ رہے ہیں۔ پناہ گزینوں کی اکثریت جرمنی پہنچنا چاہتی ہے۔

تارکینِ وطن کے معاملے پر مختلف حکومتوں کے درمیان اختلافات کی وجہ سے یورپ میں شمال مشرق کے راستے سے داخل ہونے والوں کو ایک ملک کی سرحد سے دوسرے ملک کی سرحد کی جانب دھکیلا جا رہا ہے۔

خیال رہے کہ اگلے ہفتے یورپی یونین میں تارکینِ وطن کے حوالے سے دو اہم اجلاس منعقد ہوں گے۔ پناہ کی تلاش میں آنے والے ان افراد میں سے زیادہ تر کا تعلق شام، افغانستان اور عراق سے ہے۔

ہزاروں تارکینِ وطن رواں ہفتے سربیا کے راستے کروئیشیا میں داخل ہوئے تھے کیونکہ ہنگری نے سربیا سے متصل اپنی سرحد کو بند کر دیا تھا۔ جس کی وجہ سے شمال کی جانب ان کا راستہ کٹ گیا تھا۔

جمعے کو کروئیشیا کے وزیرِاعظم زوران میلانووچ نے خبردار کیا تھا کہ ان کا ملک مزید تارکین وطن کو جگہ دینے کا متحمل نہیں اور ملک میں آنے والے پناہ گزیوں کو ’آگے روانہ کر دیا جائے گا۔‘

ملک کے وزیرِ داخلہ نے اپنے بیان میں کہا تھا کہ تارکینِ وطن کی تعداد 17 ہزار سے بڑھ چکی ہے اور 3000 ہنگری سے گزر چکے ہیں۔

اب ہنگری تارکینِ وطن کی رجسٹریشن دو مراکز پر کر رہا ہے اور یہ مراکز آسٹریا کی سرحد کے قریب ہیں۔

آسٹریا کا کہنا ہے کہ تارکینِ وطن کو رکھنے کے معاملے پر ہنگری کے ساتھ کوئی بات چیت یا رابطہ نہیں ہوا۔

مرکزی یورپ میں موجود حکومتیں اپنی سرحدوں کی حفاظت نہ کر سکنے کی وجہ سے ایک دوسرے پر شدید تنقید کر رہی ہیں۔ اور زیادہ تر حکومتیں جرمنی پر الزام لگا رہی ہیں کہ اسی نے سب سے پہلے سفر کرنے کے لیے تارکینِ وطن کی حوصلہ افزائی کی تھی۔تارکینِ وطن کا بحران اہم تاریخیں: