کیمرون: خودکش حملے میں 19 افراد ہلاک
،تصویر کا ذریعہAFP
افریقی ملک کیمرون شمالی قصبے ماروئا میں ایک خودکش حملے میں حملہ آور سمیت کم از کم 19 افراد ہلاک ہوگئے ہیں۔
سنیچر کی شام ایک مقبول بار میں ہونے والے اس بم دھماکے میں دیگر متعدد افراد کے زخمی ہونے کی بھی اطلاعات ہیں۔
یاد رہے کہ تین روز قبل اسی قصبے میں یکے بعد دیگرے دو بم دھماکوں میں 13 افراد ہلاک ہوئے تھے۔
حکام کو خدشہ ہے کہ ان حملوں کی ذمہ دار نائیجیریا میں سرگرم شدت پسند تنظیم بوکو حرام ہے۔
کیمرون کو فوج اس قصبے کو بوکو حرام کے خلاف کارروائیوں کے لیے صدر مقام کے طور پر استعمال کرتی ہے۔ نائیجیریا میں موجود بوکو حرام کے خلاف ایک بین الاقوامی اتحادی فورس کام کر رہی ہے جس میں متعدد افریقی ممالک کی فوج شریک ہے۔
واضح رہے کہ رواں ماہ کے دوران نائیجریا میں پرتشدد حملوں میں تقریباً تین سو افراد ہلاک ہوئے ہیں۔
اس سال کے آغاز میں بوکوحرام نے اطلاعات کے مطابق عراق اور شام میں سرگرم شدت پسند تنظیم دولتِ اسلامیہ کے ساتھ وفاداری کا اعلان کیا تھا۔
،تصویر کا ذریعہAFP
اقوام متحدہ نے گذشتہ سال بوکوحرام تنظیم پر پابندیاں عائد کی تھیں۔
End of سب سے زیادہ پڑھی جانے والی
بوکوحرام اسلام کے ایسے سخت گیر نظریے کی پیروی کرتا ہے جو مسلمانوں کو کسی بھی قسم کی مغربی طرز کی سیاسی یا معاشرتی سرگرمیوں میں حصہ لینے سے منع کرتا ہے۔ اس میں انتخابات میں حصہ لینا، ٹی شرٹیں پہنا یا سیکولر تعلیم حاصل کرنا بھی شامل ہیں۔
شدت پسند تنظیم بوکوحرام نے افریقہ کی سب سے پرتشدد بغاوت شروع کر رکھی ہے۔ اس نے نائیجیریا کے بڑے حصوں پر تسلط قائم کر لیا ہے اور نائجیریا کی سالمیت کے لیے خطرہ بننے کے علاوہ پڑوسی ملک کیمرون کے ساتھ بھی سرحد پر نیا محاذ کھولا ہے۔
حکام کا خیال ہے کہ نائجیریا کے شمال مغرب میں جاری شورش سے پیدا ہونے والے انسانی بحران سے تقریباً 30 لاکھ افراد متاثر ہوئے ہیں۔
اس تنظیم کے سربراہ ابوبکر شیکاؤ کے بارے میں کہا جاتا ہے کہ وہ ایک تنہائی پسند، بے خوف اور پیچیدہ شخصیت کے مالک ہیں۔
