فرانس: شہریوں کو کچلنے کی ایک اور کوشش، دس زخمی
،تصویر کا ذریعہAFP
فرانس کے مغربی شہر نیٹس میں ایک شخص نے کرسمس کی خریداری کرنے کے لیے جمع افراد پرگاڑی چڑھا دی ہے۔
پیر کی شب پیش آنے والے اس واقعے میں دس افراد زخمی ہوئے ہیں جن میں سے کچھ کی حالت نازک بتائی جاتی ہے۔
گاڑی کے ڈرائیور نے بعد میں خود کو چاقو مار کر زخمی کر لیا اور اس کی حالت بھی تشویشناک ہے۔
فرانس کے صدر فرانسوا اولاند نے ملک میں پیش آنے والے ایسے واقعات کی فوری طور تحقیقات کرانے کا اعلان کیا ہے۔
انھوں نے فرانسیسی عوام سے اپیل کی ہے کہ وہ خوفزدہ نہ ہوں۔
یہ واقعہ ڈیژوں نامی شہر میں راہ گیروں کو گاڑی سے کچلنے کی کوششوں کے اگلے ہی دن پیش آیا ہے۔
،تصویر کا ذریعہAFP
اتوار کو ڈیژوں میں ایک ’ذہنی بیمار‘ شخص نے نعرۂ تکبیر بلند کرتے ہوئے پانچ مقامات پر سڑک کنارے چلنے والے افراد پر گاڑی چڑھا دی تھی۔
اس حملے میں 11 افراد زخمی ہوئے تھے۔
End of سب سے زیادہ پڑھی جانے والی
اس سے قبل سنیچر کو بھی ایک شخص نے یہی نعرہ لگاتے ہوئے پولیس تھانے کے باہر تین اہلکاروں پر حملہ کیا تھا۔
تاہم تفتیش کاروں کا کہنا ہے کہ وہ ابھی نہیں کہہ سکتے کہ ان تینوں واقعات کا آپس میں کوئی تعلق ہے یا نہیں تاہم ان تینوں حملہ آوروں کا کٹر اسلامی تنظیموں سے براہ راست کوئی تعلق نہیں دکھائی دیتا۔
پیرس میں بی بی سی کے نامہ نگار کا کہنا ہے کہ شہریوں کو نشانہ بنائے جانے کے واقعات نقالی کے جرائم لگ رہے ہیں۔
خیال رہے کہ سنیچر اور اتوار کو ہونے والے دونوں حملوں میں حملہ آور نے نعرۂ تکبیر بلند کیا تھا اور اس وقت فرانس میں اسلامی شدت پسند گروہوں میں عوامی دلچسپی کا معاملہ گرم ہے۔
