مناء رانا بی بی سی اردو ڈاٹ کام، لاہور

	سری لنکا کے خلاف دو ٹیسٹ میچز کے لیے متوقع 20 سے 25 کھلاڑی چنیں جائیں گے۔

چیف سلیکٹر عبدالقادر کا کہنا ہے کہ دس فروری کو چئرمین کرکٹ بورڈ اعجاز بٹ نے ایک اجلاس بلایا ہے جس میں سلیکشن کمیٹی، پاکستان کی ٹیم کے کوچ انتخاب عالم اور کپتان یونس خان شامل ہوں گے۔ اس روز پہلے پریکٹس میچ کے لیے ٹیم کے اعلان کے علاوہ پاکستان اور سری لنکا کے خلاف دو ٹیسٹ میچز کے لیے متوقع 20 سے 25 کھلاڑی چنیں جائیں گے۔

عبدالقادر کے مطابق چونکہ ٹیسٹ میچز میں ابھی کچھ وقت ہے اس لیے ان متوقع کھلاڑیوں کی فٹ نس اور کارکردگی کا چند دن کیمپ میں جائزہ لیا جائے گا اور پھر حتمی ٹیم کا اعلان ہو گا۔

عبدالقادر کے مطابق ان متوقع کھلاڑیوں میں قائد اعظم ٹرافی کے سلسلے میں جاری فرسٹ کلاس میچز جو کہ چار روزہ ٹیسٹ میچز ہیں بہترین کاکردگی دکھانے والوں کو مد نظر رکھا جائے گا لیکن سلیکشن کی بنیاد صرف جاری فرسٹ کلاس میچز نہیں بلکہ کھلاڑیوں کی گزشتہ سال سے لے کر اب تک کی مسلسل کارکردگی بھی مد نظر رکھی جائے گی اور ان کھلاڑیوں کو موقع دیا جائے گا جو تسلسل کے ساتھ پرفارمنس دے رہے ہیں۔

عبدالقادر اس سے پہلے بھی ایک بار اس بات کا عندیہ دے چکے ہیں کہ سری لنکا کے خلاف ٹیسٹ میچز میں کافی تبدیلیاں ہو سکتیں ہیں۔
یاد رہے کہ جنوری میں ہونے والی ون ڈے سیریز میں سری لنکا کی ٹیم نے پاکستان کو بد ترین شکست سے دو چار کیا تھا۔