روح اللہ نیک پائی کا یہ تمغہ افغانستان کا اولمپکس تاریخ میں پہلا میڈل ہے

چین نے اب تک پینتالیس طلائی تمغے جیتے ہیں جبکہ امریکہ چھبیس اور برطانیہ سولہ گولڈ میڈل حاصل کر کے بالترتیب دوسرے اور تیسرے نمبر پر ہیں۔ بدھ کو ایتھلیٹکس، سوئمنگ، کشتی رانی، سرفنگ، تائیکوانڈو اور کشتی کے مقابلوں میں مزیدگیارہ طلائی تمغوں کا فیصلہ ہوا۔

اولمپکس کا میڈل ٹیبل

بیجنگ اولمپکس وینیوز، تفصیلی گائیڈ

اولمپکس کی مکمل کوریج کے لیے یہاں کلک کریں

بدھ کو ہونے والے مقابلوں میں سب سے اہم اور دلچسپ مقابلہ مردوں کی دو سو میٹر دوڑ تھی جس میں سو میٹر کے اولمپک چیمپئن یوسین بولٹ نے نہ صرف توقعات کے مطابق طلائی تمغہ جیتا بلکہ مقررہ فاصلہ انیس اعشاریہ تین صفر سیکنڈ میں طے کر امریکہ کے مائیکل جانسن کا برسوں پرانا ریکارڈ بھی توڑ دیا۔

اس کے علاوہ جنوبی ایشیائی ممالک کے لیے بھی اولمپکس کا بارہواں دن اچھا ثابت ہوا۔ پہلے تو افغانستان سے تعلق رکھنے والے تائیکوانڈو کھلاڑی روح اللہ نیک پا اٹھاون کلوگرام درجے کے مقابلوں میں کانسی کا تمغہ جیت کر اپنے ملک کے لیے اولمپکس تاریخ میں پہلا تمغہ جیتنے والے کھلاڑی بنے اور پھر بھارت کے پہلوان سوشیل کمار نے بھی کانسی کا تمغہ جیت کر اپنے ملک کے لیے سنہ 1952 کے بعد کُشتی میں پہلا میڈل حاصل کیا۔

	بولٹ کا بیجنگ اولمپکس میں یہ دوسرا گولڈ میڈل ہے

بھارت کی خوشی اس وقت دوبالا ہو گئی جب باکسر وجندر کمار نے مڈل ویٹ درجے کے کوراٹر فائنل مقابلے میں ایکواڈور کے کارلوس گونگورا کو شکست دے کر اپنے ملک کے لیے کم از کم کانسی کے تمغے کا حصول یقینی بنا لیا۔

بارہویں دن دو سو میٹر دوڑ کے علاوہ ایتھلیٹکس کے دیگر مقابلوں میں خواتین کی چار سو میٹر رکاوٹوں کی دوڑ میں جمیکا کی میلین واکر نے طلائی جبکہ امریکہ کی شینا ٹوسٹا نے نقرئی تمغہ جیتا۔ انگلینڈ کی خاتون سپرنٹر ٹاشا ڈینورز تیسرے نمبر پر رہیں۔

خواتین کے ہیمر تھرو مقابلوں میں بیلاروس کی ا کسانامیانکووا نے نیا اولمپک ریکارڈ قائم کرتے ہوئے سونے کا تمغہ جیتا جبکہ کیوبا کی یپسی مورینو اور چین کی ژانگ وینکسیو بالترتیب چاندی اور کانسی کے تمغے کی حقدار ٹھہریں۔

خواتین کی دس کلومیٹر میراتھن تیراکی میں روسی تیراک لاریسا الچینکو پہلے درجے پر رہیں جبکہ نقرئی اور کانسی کے تمغے برطانوی تیراکوں نے حاصل کیے۔ تال میل کے ساتھ تیراکی کا مقابلہ بھی روسی ٹیم نے ہی جیتا جبکہ خواتین کی سرفنگ میں چین نے پہلی، اٹلی نے دوسری جبکہ برطانیہ نے تیسری پوزیشن حاصل کی۔

خواتین کے انچاس کلوگرام تائیکوانڈو مقابلوں میں چین نے طلائی اور تھائی لینڈ نے نقرئی تمغے حاصل کیے جبکہ مردوں کے اٹھاون کلوگرام مقابلوں میں میکسیکو کے کھلاڑی نے پہلی پوزیشن حاصل کی۔اس کے علاوہ کشتی کے مقابلوں میں ترکی اور روس نے طلائی، ازبکستان اور یوکرین نے چاندی جبکہ بھارت اور بیلا روس نے کانسی کے تمغے جیتے۔

اولمپکس کے تیرہویں دن تیئس طلائی تمغوں کا فیصلہ ہوگا اور ایتھلیٹکس، بیچ والی بال، سائیکلنگ، ڈائیونگ، گھڑ سواری، فٹبال، پنٹاتھلن، کشتی رانی، سافٹ بال، تیراکی، تائیکوانڈو، واٹر پولو اور کشتی جیسے کھیلوں میں دنیا کے مختلف ممالک کے کھلاڑی ان تمغوں کے لیے مقابلہ کریں گے۔