 | | | چین کی ہی کیکسن نے جمناسٹک میں سونے کا تمغہ جیتا |
اولمپِک کھیلوں کے گیارہویں دن کے آغاز پر چین کی برتری قائم ہے جبکہ امریکہ دوسرے اور برطانیہ تیسرے نمبر پر ہے۔ منگل کو بیس ایونٹس کے فائنل مقابلے ہوں گے جن میں ایتھلیٹکس، سائیکلنگ، ڈائیونگ، گھڑ سواری، جمناسٹک، کشتی رانی، ٹرائیتھلن اور ویٹ لفٹنگ کے مقابلوں میں ایتھلیٹ اپنی قسمت آزمائیں گے۔ پاکستان بھی منگل کو اولمپکس ہاکی کے ابتدائی راؤنڈ میں اپنا آخری میچ ہالینڈ کے خلاف کھیلے گا۔ ابتدائی میچوں میں انگلینڈ اور آسٹریلیا کے ہاتھوں شکست کے بعد پاکستان کے سیمی فائنل میں پہنچنے کے امکانات معدوم ہو چکے ہیں۔ دسویں دن کے کھلوں کے اختتام پر چین نے اب تک انتالیس طلائی، چودہ نقرئی اور چودہ ہی کانسی کے تمغے حاصل کیے ہیں۔ امریکی کھلاڑیوں نے دسویں دن ہونے والے مقابلوں میں مزید تین طلائی تمغے جیت کر یہ تعداد بائیس تک پہنچا دی جبکہ چاندی اور کانسی کے امریکی تمغوں کی تعداد بالترتیب چوبیس اور چھبیس ہے۔ برطانوی ٹیم جو اتوار کو چار طلائی تمغے حاصل کر کے تیسرے نمبر پر آ گئی تھی سوموار کو مزید ایک طلائی اور ایک نقرئی تمغہ جیتنے میں کامیاب ہوئی اور یوں دسویں دن کے اختتام پر اس نے بارہ طلائی، سات چاندی اور آٹھ کانسی کے تمغے جیتے تھے۔ | | | یلینا ازنبایووا نے اپنا ہی عالمی ریکارڈ توڑ دیا |
دسویں دن کے مقابلوں کی خاص بات روس کی پول والٹ کھلاڑی یلینا ازنبایووا کا نیا عالمی ریکارڈ تھا۔ یلینا نے پانچ اعشاریہ صفر پانچ میٹر اونچی چھلانگ لگا کر نہ صرف طلائی تمغہ جیتا بلکہ اپنا ہی قائم کردہ عالمی ریکارڈ بھی توڑ دیا۔ ایتھلیکٹس مقابلوں میں امریکہ کے مرد ایتھلیٹس نے چار سو میٹر رکاوٹوں کی دوڑ میں کلیں سویپ کرتے ہوئے پہلی تین پوزیشنیں حاصل کیں جبکہ لانگ جمپ مقابلے میں طلائی تمغہ پانامہ کے ارونگ سلادینو کے حصے میں آیا۔ اس مقابلے میں جنوبی افریقہ کےخوتسو موکواینا نے نقرئی جبکہ کیوبا کے ابراہیم کمیجو نے کانسی کا تمغہ حاصل کیا۔ | 
چین پہلے، برطانیہ اب تیسرے نمبر پر 
