عبدالرشید شکور بی بی سی اردو ڈاٹ کام، ملتان

	یونس خان نے پاکستان کو ابتدائی نقصانات کے بعد ٹیم کو سنبھال لیا ہے

تفصیلی سکور کارڈ

ملتان کرکٹ سٹیڈیم میں شعیب ملک نے ٹاس جیت کر پہلے بیٹنگ کا فیصلہ کیا لیکن گزشتہ میچ کے مین آف دی میچ شاہد آفریدی بغیر کوئی رن بنائے نتینی کی گیند پر مڈآن پر نیل کے ہاتھوں کیچ ہوگئے۔

یاسرحمید کو10 رنز کے انفرادی اسکور پر شان پولاک کی گیند پر ہرشل گبز نے شارٹ مڈ وکٹ پر خوبصورتی سے کیچ کر لیا۔

پاکستانی ٹیم کی سب سے بڑی امید محمد یوسف سے وابستہ تھی جنہوں نے پچھلے دو میچوں میں ایک سنچری اور دو نصف سنچریاں بنائی تھیں لیکن اس مرتبہ وہ صرف 5 رنز پر بوتھا کی تھرو پر رن آؤٹ ہوگئے۔ پاکستان کا اسکور اسوقت 3 وکٹوں پر صرف38 رنز تھا۔

یونس خان اور کپتان شعیب ملک کے درمیان چوتھی وکٹ کی شراکت میں بننے والے91 رنز نے ایک بڑے سکور تک پہنچنے کی امید پیدا کی لیکن پاکستانی کپتان45 کے سکور پر کیلس کی سلو گیند پر دھوکہ کھاگئے اور مڈ آف پر آسان کیچ سمتھ کو تھماگئے۔

یونس خان اور مصباح الحق کی ایک ہی اوور میں گرنے والی وکٹوں نے صورتحال یکسر تبدیل کر دی۔

یونس خان82 رنز بناکر نیل کی گیند کو پل کرنے کی کوشش میں مڈ وکٹ پر گبز کے ہاتھوں کیچ ہوئے اسوقت پاکستان کا اسکور158 رنز تھا۔ یونس خان نے ایک سو دس گیندوں پر مشتمل اپنی اننگز میں دو چھکے اور چھ چوکے لگائے۔

آندرے نیل نے اپنے اسی اوور میں7 رنز بنانے والے مصباح الحق کو باؤچر کے ہاتھوں کیچ کرا دیا۔

عبدالرحمن اور کامران اکمل کے درمیان ساتویں وکٹ کے لیے بننے والے 60 رنز پاکستانی ٹیم کے لیے بہت قیمتی تھے۔ عبدالرحمن 37گیندوں پر3 چوکوں کی مدد سے31 رنز بناکر مورکل کی گیند پر بولڈ ہوئے۔

کامران اکمل دو چوکوں اور ایک چھکے کی مدد سے 28 رنز بناکر پولاک کے ہاتھوں کیچ ہوکر اس سیریز میں بوتھا کی پہلی وکٹ بن گئے۔ بوتھا نے اسی اوور میں عمرگل کو بھی نتینی کے ہاتھوں کیچ کرا دیا۔

پاکستان کی ٹیم: شعیب ملک ( کپتان) یاسرحمید، کامران اکمل، یونس خان، محمد یوسف، مصباح الحق، شاہد آفریدی، عمرگل، راؤافتخار، محمد آصف اور عبدالرحمن۔

جنوبی افریقہ کی ٹیم: گریم اسمتھ( کپتان) ہرشل گبز۔ ژاک کیلس۔ اے ڈی بی ویلیئرز۔ مارک باؤچر۔ جین پال ڈومینی۔ شان پولاک۔ ایلبی مورکل۔یوہان بوتھا۔ آندرے نیل اور مکھایا نتینی شامل ہیں۔

نیوزی لینڈ کے بلی باؤڈن اور پاکستان کے علیم ڈار میچ کے امپائرز ہیں جبکہ آسٹریلیا کے ایلن ہرسٹ میچ ریفری کے فرائض انجام دے رہے ہیں۔