عبدالرشید شکور بی بی سی اردو ڈاٹ کام، فیصل آباد

	شاہد آفریدی کی پرفارمنس نے پاکستان کی جیت میں اہم کردار ادا کیا

شاہد آفریدی نے بی بی سی سے بات کرتے ہوئے کہا کہ انہوں نے جنوبی افریقہ کے خلاف پہلے ون ڈے سے قبل کوچ جیف لاسن سے اس خواہش کا اظہار کیا تھا کہ وہ چھٹے نمبر پر بیٹنگ سے خوش ہیں لیکن چونکہ اوپنرز اچھی کارکردگی کا مظاہرہ نہیں کر پا رہے ہیں لہذا وہ انہیں اوپنر کے طور پر ایک موقع دیں۔

شاہد آفریدی نے فیصل آباد کے تیسرے میچ میں صرف اٹھارہ گیندوں پر دو چھکوں اور چار چوکوں کی مدد سے32 رنز بنائے۔اس سے قبل انہوں نے تین وکٹیں بھی حاصل کیں یہ کارکردگی انہیں مین آف دی میچ ایوارڈ دلانے کا سبب بنی۔

شاہد آفریدی ون ڈے انٹرنیشنل میچوں میں17 ویں مرتبہ مین آف دی میچ بنے ہیں۔ سب سے زیادہ55 مرتبہ مین آف دی میچ ایوارڈ حاصل کرنے والے بھارت کے سچن تندولکر ہیں جبکہ پاکستان کی طرف سے یہ ریکارڈ سعید انور کا 28 مرتبہ مین آف دی میچ ایوارڈ حاصل کرنے کا ہے۔

شاہد آفریدی نے اس سوال پر کہ کیا آئندہ کے میچوں میں بھی آپ اوپنر کی حیثیت سے کھیلنا پسند کرینگے کہا کہ اوپنرز دو ڈھائی سال سے مشکلات سے دوچار ہیں۔ جب سے انہیں اوپننگ سے نچلے نمبروں پر لایا گیا ہے مختلف اوپنرز آزمائے گئے ہیں انہوں نے جنوبی افریقہ کے دورے میں بھی کہا تھا کہ ان سے اوپننگ کرائی جائے جس پر ایک میچ میں انہوں نے اوپننگ کی تھی۔

شاہد آفریدی نے تیسرے میچ کی اپنی پرفارمنس پر کہا کہ وہ کوشش کرتے ہیں کہ ٹیم پر بوجھ نہ بنیں اور ہر شعبے میں اپنی موجودگی کا احساس دلائیں۔

شاہد آفریدی نے کہا کہ چونکہ وہ کافی دنوں بعد اننگز کا آغاز کر رہے تھے لہذا خود پر دباؤ محسوس کر رہے تھے اور ان کی کوشش تھی کہ نئی گیند کا اثر زائل کرتے ہوئے ٹیم کو اچھا اسٹارٹ دینے میں کامیاب ہوجائیں تاکہ بعد میں آنے والے بیٹسمینوں پر دباؤ نہ ہو لیکن محمد یوسف نے بہت اچھی بیٹنگ کی اور میچ کو جیت پر ختم کیا۔