عبدالرشید شکور بی بی سی اردو ڈاٹ کام، کیپ ٹاؤن

	عمر گل نے چار اوورز میں پندرہ رنز دے کر تین کھلاڑیوں کو آؤٹ کیا

پاکستان بمقابہ ٹیوزی لینڈ

تفصیلی سکور بورڈ

دلچسپ بات یہ ہے کہ ورلڈ کپ 92 کے سیمی فائنل میں بھی پاکستان نے نیوزی لینڈ کو شکست دی تھی۔

نیولینڈز میں پاکستان کی اس جیت کا سہرا بولرز کے سر جاتا ہے جنہوں نے نظم وضبط سے بولنگ کرتے ہوئے ٹاس جیت کر پہلے بیٹنگ کرنے والی نیوزی لینڈ کی ٹیم کو مقررہ بیس اوورز میں 9 وکٹوں پر143 رنز سے آگے نہیں بڑھنے دیا۔

عمرگل نے اپنی تمام تر صلاحیتوں کو بروئے کار لاتے ہوئے ذہانت سے بولنگ کی اور صرف پندرہ رنز دے کر تین وکٹیں حاصل کیں۔ عمر گل کو مین آف دی میچ قرار دیا گیا۔ فواد عالم نے ٹورنامنٹ میں ملنے والے پہلے موقع سے بھرپور فائدہ اٹھاتے ہوئے دو وکٹیں حاصل کیں۔

جواب میں عمران نذیر کی جارحانہ بیٹنگ سے حوصلہ پاتے ہوئے پاکستان نے مطلوبہ اسکور 19 ویں اوور میں پورا کرلیا۔

	راس ٹیلر37رنز بنا کر ناٹ آؤٹ رہے

عمران نذیر نے پٹھا کھچ جانے کے بعد رنر کی مدد سے بیٹنگ کی اور اپنے مخصوص انداز میں بیٹنگ کرتے ہوئے پانچ چھکوں اور تین چوکوں کی مدد سے59 رنز اسکور کیے۔

عمران نذیر اور محمد حفیظ نے پہلی وکٹ کی شراکت میں 60 رنز کا اضافہ کیا۔
محمد حفیظ نے32 رنز اسکور کیے جس میں تین چوکے اور دو چھکے شامل تھے۔
یونس خان چار اور شاہد آفریدی چھ رنز بنا کر آؤٹ ہوئے تو پاکستانی ٹیم پر دباؤ آتا محسوس ہوا لیکن شعیب ملک اور مصباح الحق نے کشتی کنارے لگا دی۔ شعیب ملک 26 اور مصباح الحق 16 رنز بنا کر ناٹ آؤٹ رہے۔

اس سے قبل نیوزی لینڈ کی اننگز میں لو ونسنٹ اور برینڈن مک کیولم کی اوپننگ شراکت پچاس رنز کی رہی۔ ونسنٹ سلمان بٹ کی جگہ ٹیم میں شامل کیے جانے والے لیفٹ آرم اسپنر فواد عالم کی گیند پر انہی کو کیچ دے گئے۔ انہوں نے ایک چھکے اور ایک چوکے کی مدد سے28 رنز بنائے۔

شاہد آفریدی نے مک کیولم کو 26 رنز کے انفرادی اسکور پر ایل بی ڈبلیو کیا تو نیوزی لینڈ کا اسکور 74 رنز تھا۔ یہ اس ٹورنامنٹ میں شاہد آفریدی کی12 ویں وکٹ تھی۔ بھارت کے خلاف سیمی فائنل سے قبل آسٹریلیا کے اسٹورٹ کلارک کی وکٹوں کی تعداد بھی12 ہے۔

	عمران نذیر نے عمدہ بیٹنگ کرتے ہوئے 59 رنز سکور کیے

اس ٹورنامنٹ میں سب سے زیادہ13 چھکے لگانے والے خطرناک کریگ مک ملن کی قیمتی وکٹ پر پاکستانی کھلاڑیوں کی خوش دیکھنے لائق تھی۔ وہ ایک چوکے اور ایک چھکے کی مدد سے12 رنز بنا کر فواد عالم کی گیند پر یونس خان کے ہاتھوں کیچ ہوگئے۔ اس طرح نیوزی لینڈ کی آدھی ٹیم 104 رنز پر پویلین میں جاچکی تھی۔

عمرگل نے اپنی عمدہ بولنگ جاری رکھتے ہوئے جیکب اورم کو بھی صرف ایک رن پر کامران اکمل کے ہاتھوں کیچ کرا دیا۔

کپتان ڈینئل ویٹوری بغیر کوئی گیند کھیلے راس ٹیلر کے رن پر نان اسٹرائکر اینڈ پر آفریدی کی تھرو پر رن آؤٹ ہوگئے۔ شین بونڈ بھی4 رنز پر رن آؤٹ ہوئے۔ راس ٹیلر37رنز بنا کر ناٹ آؤٹ رہے۔ محمد آصف کے آخری اوور میں انہوں نے دو چوکوں اور ایک چھکے کی مدد سے17 رنز بنائے۔ آخری گیند پر کامران اکمل نے ان کا آسان کیچ ڈراپ کر دیا۔