بریٹ لی نویں عالمی کپ میں شرکت نہیں کر سکے تھے

اس سال ویسٹ انڈیز میں ون ڈے میچوں کے نویں عالمی کپ کی فاتح ٹیم کو ٹوئنٹی ٹوئنٹی ورلڈ کپ میں اپنی صلاحیتیں دکھانے کا ایک اور موقع ملے گا۔

تاہم اس مرتبہ تیس رکنی سکواڈ کی تعداد کم کرکے پندرہ کردی گئی ہے۔ ٹیم کے بہترین کھلاڑیوں کو سکواڈ میں شامل کیا گیا ہے۔

واضح رہے کہ ٹوئنٹی ٹوئنٹی ورلڈ کپ جنوبی افریقہ میں 14 سے 24 ستمبر کے درمیان کھیلا جا رہا ہے۔

آسٹریلوی چیف سلیکٹر اینڈریو ہیلڈچ کا کہنا تھا:’ آسٹریلیا کی ٹیم کو ٹوئنٹی ٹوئنٹی میچ کھیلنے کا زیادہ موقع تو نہیں ملا ہے تاہم بظاہر ایسا نہیں لگتا کہ ٹیم کے کھلاڑیوں کو اس قسم کے میچ کھیلنے میں کوئی دشواری ہو گی‘۔

آسٹریلوی ٹیم کے پیس بالر بریٹ لی ٹخنے کی چوٹ کے بعد مکمل فٹ ہوکر سکواڈ کا حصہ ہوں گے۔وہ اس سال ویسٹ انڈیز میں ہونے والے عالمی ورلڈ کپ میں شرکت نہیں کرسکے تھے جس میں ان کی ٹیم نے شاندار کارکردگی کا مظاہرہ کیا تھا۔ گلن میگراہ کی ریٹائرمنٹ کے بعد انہیں ٹیم میں اپنی جگہ بنانے کا دوبارہ موقع ملا ہے۔ ٹوئنٹی ٹوئنٹی ورلڈ کپ میں کیمرون وائٹ شرکت نہیں کرسکیں گے۔ سمرسٹ میں ان کے بنائے 141 رنز ٹوئنٹی ٹوئنٹی میچوں کی تاریخ کا اب تک کا سب سے بڑا سکور ہے۔

اینڈریو ہیلڈچ کا کہنا تھا کہ بریٹ لی کی ٹیم میں واپسی بڑی خوش آئند ہے۔ وہ پوری طرح سے فٹ اور ٹیم میں ایک بار پھر اپنی جگہ بنانے کے لیے تیار ہیں۔

انڈیا میں کھیلی جانے والی ون ڈے سیریز کے لیے بھی آسٹریلوی سکواڈ کے ناموں کا اعلان کردیا گیا ہے۔ چودہ رکنی سکواڈ میں بریڈ ہیڈن شامل نہیں ہیں۔

ٹوئنٹی ٹوئنٹی ورلڈ کپ کے لیے آسٹریلوی سکواڈ:

رکی پونٹنگ (کپتان)، ایڈم گلکرسٹ، ناتھن بریکن، سٹوِئٹ کلارک، مائیکل کلارک، بریڈ ہیڈن، میتھو ہیڈن، بریڈ ہوج، بریڈ ہوگ، مائیکل ہسی، میچل جونسٹن، بریٹ لی، اینڈریو سمنڈز، شان ٹیٹ اور شان واٹسن۔

25 ستمبر سے 21 اکتوبر۔ دورۂ انڈیا کے لیے آسٹریلوی ٹیم:

رکی پونٹنگ (کپتان)، ایڈم گلکرسٹ، ناتھن بریکن، سٹارٹ کلارک، مائیکل کلارک، میتھو ہیڈن، بریڈ ہوج، بریڈ ہوگ، مائیکل ہسے، میچل جونسٹن، بریٹ لی، اینڈریو سمنڈز، شان ٹیٹ اور شان واٹسن۔