مناء رانا بی بی سی اردو ڈاٹ کام لاہور

	کوئٹہ کیمپ میں عمران فرحت شامل ہونگے

ایبٹ آباد میں چند دن پہلے ختم ہونے والے کیمپ کے کھلاڑیوں میں دو کھلاڑیوں کے ناموں کا اضافہ کیا گیا ہے۔ اوپنگ بیٹسمین عمران فرحت اور سپنر عبدالرحمن کو کوئٹہ میں لگائے جانے والے کیمپ میں شامل کر لیا گیا ہے۔

پاکستان کی ٹیم کے مینجر طلعت علی کیمپ کمانڈنٹ ہوں گے۔اس کیمپ کے لیےہارون رشید کو بیٹنگ کوچ اور عاقب جاوید کو بالنگ کوچ کی ذمہ داری سونپی گئی ہے۔

ہارون رشید کا کہنا ہے کہ ایبٹ آباد کے کیمپ میں کھلاڑیوں کی فزیکل فٹنس پر خصوصی توجہ دی گئی تھی لیکن کوئٹہ میں فزیکل فٹنس کے ساتھ کھیل کے ہر شعبے میں پریکٹس کی جائے گی کیونکہ اب کھلاڑیوں کو طویل کرکٹ سیزن کھیلنا ہے۔

ٹونٹی ٹونٹی ورلڈ کپ اور جنوبی افریقہ کی کرکٹ ٹیم کے دورہ پاکستان کی تیاری کے لیے کھلاڑیوں کو فٹنس کے ساتھ بالنگ بیٹنگ اور فیلڈنگ میں بھی محنت کرنا ہو گی۔ کوئٹہ میں ایک طویل عرصے کے بعد قومی سطح کی کرکٹ کی کوئی سرگرمی ہورہی ہے۔

ذرائع کے مطابق پاکستان کی ٹیم کے کھلاڑی کوئٹہ میں کیمپ میں تربیت سے گریزاں تھے کیونکہ ایک تو بلوچستان میں طوفانی بارشوں کے سبب موسمی حالات بہتر نہیں دوسرے کھلاڑیوں کو وہاں سیکیورٹی کا خدشہ بھی ہے۔

کھلاڑیوں کی اس تشویش کے باوجود پاکستان کرکٹ بورڈ نے کوئٹہ میں کیمپ لگانے کا اپنا فیصلہ تبدیل نہیں کیا۔ کوئٹہ میں کیمپ دس جولائی سے تئیس جولائی تک لگایا جا رہا ہے۔

کیمپ میں یہ کھلاڑی شامل ہیں: سلمان بٹ، عمران نزیر، محمد حفیظ، عمران فرحت، محمد یوسف، یاسر حمید، مصباح الحق، نوید لطیف، فیصل اقبال، عاصم کمال، فواد عالم، شعیب ملک، شاہد آفریدی، عبدالرزاق، کامران اکمل، محمد آصف، شعیب اختر، محمد سمیع، عمر گل، راؤ افتخار، نجف شاہ۔