صلاح الدین بی بی سی اردو داٹ کم، دلی

	انیل کمبلے نے ایک روزہ میچوں میں 337 وکٹیں حاصل کی ہیں

بنگلور کے چینا سوامی سٹیڈیم میں ایک نیوز کانفرنس میں اپنی ریٹائر منٹ کا اعلان کرتے ہوئے انیل کمبلے نے کہا کہ وہ ورلڈ کپ میں اچھے کھیل کا مظاہرہ کرکے سبکدوش ہونا چاہتے تھے لیکن ان کا یہ خواب پورا نا ہوسکا۔

’ہر بار من کی مراد پوری نہیں ہوتی ہے لیکن میں نے اعلان کردیا تھا کہ ورلڈ کپ کے بعد ون ڈے کرکٹ چھوڑ دوں گا۔‘

کمبلے نے اپنے تمام ساتھی کھلاڑیوں، کپتان اور کوچز کا شکریہ ادا کیا اور کہا ’مجھے میرے ساتھیوں کا ہمیشہ تعاون حاصل رہا ہے اور سبھی میری حوصلہ افزائی کرتے رہے ہیں۔‘

بھارت کی طرف سے انیل کمبلے نے ون ڈے کرکٹ میں سب سے زیادہ وکٹ حاصل کیے ہیں۔ ان کی سب سے اچھی پرفارمنس ویسٹ انڈیز خلاف ہے جس میں انہوں نے بارہ رنز دیکر چھ وکٹیں حاصل کی تھیں۔

	انیل کمبلے ٹیسٹ کرکٹ کھیلتے رہیں گے

ایک سوال کے جواب میں انہوں نے کہا کہ، 1992 کے ورلڈ کپ میں بنگلور میں پاکستان کے ساتھ سیمی فائنل میچ، شارجہ میں ان کی پہلی ون ڈے سیریز اور ہیرو کپ جیسے ٹورنامنٹ ان کی بہترین یادوں میں شامل ہیں۔

انیل کمبلے کا کہنا تھا کہ ان میں اب بھی کرکٹ باقی ہے اس لیے وہ ٹیسٹ کرکٹ کھیلیں گے۔ ’جب مجھے لگے گا کہ میں ٹیم کے لیے کارآمد نہیں ہوں تو میں ایک دن ٹیسٹ کرکٹ کو بھی الوداع کہہ دونگا۔ ایسا کوئی ہدف نہیں ہے کہ مجھے چھ سو وکٹیں پوری کرنی ہیں۔‘

کمبلے ٹیسٹ میچیز میں بھی پانچ سو سے زیادہ وکٹیں حاصل کر چکے ہیں اور بھارت کی طرف سے وہی ٹیسٹ میں بھی سب سے زیادہ وکٹیں لینے والے کھلاڑی ہیں۔

انیل کمبلے پویلین میں بیٹھ کر فوٹو گرافی بھی کرتے رہیں ہیں۔ یہ ان کا شوق ہے اور ان کے پاس کرکٹ کے بہت سے شاندار لمحے قید ہیں۔ ان کا کہنا ہے کہ وہ کرکٹ پر ایک کتاب لکھیں گےتو ان ساری تصویروں کو بھی اس میں شامل کرنے کی کوشش کریں گے۔