شکیل اختر بی بی سی اردو ڈاٹ کام، دلّی

	کمبلے نے 500 وکٹ کا ریکارڈ 105 ٹیسٹ میچ کھیل کر بنایا ہے

کمبلے دنیائے ٹیسٹ کرکٹ کے وہ پانچویں بالر ہیں جنہوں نے پانچ سو ٹیسٹ وکٹیں حاصل کی ہیں۔ ان سے قبل یہ کارنامہ آسٹریلیا کے شین وارن اور گلین میگرا، سری لنکا کے مرلی دھرن اور ویسٹ انڈیز کے کورٹنی والش نے سرانجام دیا ہے۔ شین وارن اور مرلی دھرن چھ سو وکٹوں کا ہدف بھی عبور کر چکے ہیں۔ شین وارن نے اب تک 659 ، مرلی دھرن نے 600، میگرا نے 542 جبکہ والش نے 519 وکٹیں حاصل کی ہیں۔

کمبلے نے 500 وکٹ کا ریکارڈ 105 ٹیسٹ میچ کھیل کر بنایا ہے اور سری لنکا کے سپنر مرلی دھرن کے بعد وہ کم سے کم ٹیسٹ میچوں میں 500 وکٹ مکمل کرنے والے دوسرے بالر ہیں۔

انیل کمبلے نے اپنے ٹیسٹ کیرئر کا آغاز سنہ 1990 میں انگلینڈ کے خلاف اولڈ ٹریفورڈ میں کیا تھا اور اس 35 سالہ لگ اسپنر نے اپنے سولہ سالہ ٹیسٹ کیرئر میں بتیس مرتبہ ایک اننگز میں 5 وکٹ حاصل کیے ہیں جبکہ ایک ٹیسٹ میچ میں 10 وکٹ انہوں نے آٹھ بار حاصل کیئے ہیں۔ جس میں فیروز شاہ کوٹلہ گراؤنڈ پر پاکستان کے خلاف ایک اننگز میں دس وکٹیں حاصل کرنے کا کارنامہ بھی شامل ہے۔

مرلی دھرن کے بعد وہ واحد بالر ہیں جس نے ہوم پچ پر ٹیسٹ میچز میں 300 وکٹ لیئے ہیں اور کمبلے پر اس بات کے لیئے نکتہ چینی بھی کی جاتی رہی ہے کہ وہ ملک کے اندر تو کافی کامیاب رہے ہیں لیکن غیر ممالک میں ان کی کارکردگی اتنی اچھی نہیں رہی ہے۔

موجودہ انڈین کپتان راہول ڈراوڈ انیل کمبلے کو گزشتہ پندرہ برس مںی بھارت کا بہترین کھلاڑی قرار دیتے ہیں اور ان کے نزدیک کمبلے کا مقابلہ سچن تندولکر بھی نہیں کر سکتے کیونکہ کمبلے وہ انڈین کھلاڑی ہیں جو اب تک سب سے زیادہ مرتبہ انڈین فتوحات کا حصہ بن چکے ہیں۔