عارف شمیم بی بی سی اردو ڈاٹ کام، لندن

	مغموم انضمام سبینا پارک کی گراؤنڈ سے پولین کی طرف جاتے ہوئے

بنگلہ دیش نے انڈیا اور آئرلینڈ نے پاکستان کے ساتھ وہ سلوک کیا جو کہ ایک ’شریف‘ آدمی اپنے دشمن کے ساتھ بھی نہیں کرتا۔ مطلب کہ سرِ عام بے عزتی۔ ویسے بھی تو کرکٹ جنٹیلمینوں کا کھیل ہے مگر ویسٹ انڈیز میں جنوبی ایشیا کے جنٹیلمین کہیں کے نہ رہے۔

آئرلینڈ نے پاکستان کو کپ سے نکال دیا

انڈیا کا ذکر تو بعد میں پہلے 1992 کے ورلڈ کپ چیمپئنز کی آئرلینڈ کے ہاتھوں شکست کا حال۔ پاکستان نے جب 1992 میں ورلڈ کپ جیتا تھا تو اسی ٹورنامنٹ میں اس نے انگلینڈ کے خلاف 74 رنز بنائے تھے جو کہ ورلڈ کپ کے پانچ کم ترین سکورز میں سے ایک ہے۔ لیکن اُس وقت کوئی کسی سے ہار گیا اور کوئی کسی سے جیت گیا اور نتیجہ پاکستان کے پاس ورلڈ کپ کی صورت میں آیا۔ لیکن اس مرتبہ حالت بالکل مختلف ہے۔ کوئی کسی سے ہارے یا کوئی کسی سے جیتے پاکستان ورلڈ کپ سے باہر ہے۔ وجہ: اپنے گروپ میں پاکستان کا صرف زمبابوے سے ہارنا باقی ہے۔ اس کے علاوہ اسے اب کسی اور سے خطرہ نہیں۔

ایسا کیوں ہوا؟

جواب: پاکستان کرکٹ کھیلنا بھول گیا ہے۔

آپ کرکٹ بڑے سکور کرنے یا سو میل سے زیادہ تیز گیند کرنے کے لیے نہیں کھیلتے بلکہ کرکٹ کے لیے کھیلتے ہیں۔ پاکستان کرکٹ کے لیے نہیں کھیلا اور شاید عمران کی قیادت کے بعد کبھی بھی نہیں کھیلا۔ کبھی جوئے کے پیسوں کے لیے، کبھی ریکارڈز کے لیے اور کبھی نوکریاں بچانے کے لیے۔ کرکٹ کے لیے نہیں۔ نہیں تو کھلاڑی اس مقام پر پہنچ کر یا تو ریٹائر ہو جاتے ہیں یا کارکردگی دکھاتے ہیں۔ عمران خان، سنیل گواسکر، مارک وا، سٹیو وا، شین وارن اور جسٹن لینگر کی مثالیں ہمارے سامنے ہیں۔

	اوبرائن نے پاکستانی کھلاڑیوں کو بتایا کہ وکٹ پر کس طرح کھڑا ہوا جاتا ہے

وولمر کرکٹ کو زیادہ جانتے ہیں اور اتنے عرصے سے پاکستانی کھلاڑیوں کے ساتھ رہنے کے بعد وہ پاکستانی کھلاڑیوں کو بھی بہتر جاننے لگے ہیں۔ جب کوچ کا ایسی ٹیم کے متعلق یہ خیال ہو جو کہ کرکٹ کے اس بڑے ٹورنامنٹ میں ہی مشکل سے آئی ہے تو پھر ٹیم سے امید لگانا بھی میرے خیال سے دماغ کا خلل ہے۔

لیکن بات جہاں کرکٹ کی ہو اور پاکستان اور انڈیا کے چیمپئنز کی تو دماغ میں خلل بھی ٹھیک ہے۔ امید ضرور ہونی چاہیئے۔ ہاں یہی بات کھلاڑیوں پر بھی لاگو ہوتی ہے۔

	سمیع جذبات پر قابو نہ رکھ سکے

پاکستان ٹیم تو ورلڈ کپ میں اپنے بہترین بولرز کے بغیر آئی تھی، بیٹسمینوں کے بغیر تو نہیں۔ وہی بیٹسمین تھے جو کہ شعیب، آصف اور رزاق کے ساتھ آنے تھے۔ کیا ہی اچھا ہوتا کہ کوئی ایسا طریقہ ہوتا کہ یہ ورلڈ کپ کھیلنے کے لیے کوالیفائی ہی نہ کرتے۔ نہ ہی پاکستانیوں کی امیدیں بنتی اور نہ ہی اتنی جلدی ٹوٹتیں۔

آفریدی پر دو میچوں کی پابندی تھی، اب پاکستان کے باقی کھلاڑیوں نے ان کے ورلڈ کپ کھیلنے پر ہی پابندی لگا دی ہے۔ دوسری طرف ویسٹ انڈیز نہ آنے والے بھی کرکٹ کے شیدائیوں کی لعنت ملامت سے بچ گئے۔

آئرلینڈ کی ٹیم ایک اوسط درجے کی نئی ٹیم ہے۔ فرق صرف دونوں ٹیموں میں یہ ہے کہ آئرش جذبے سے کھیلے اور پاکستانی ڈرے ہوئے۔ نہ بیٹنگ کر سکے نہ بولنگ۔ آخری گیندوں کے دوران بھی پاکستانی بولرز کھیل پر حاوی نہیں تھے وہ ’کرکٹ کے بچے‘ آئرش بیٹسمین ہی ذرا نروس ہو گئے تھے۔ آخر ان کی مدد سینٹ پیٹرک نے کی جو کہ ان کے بڑے سینٹ ہیں اور جن کا کہ آج دن تھا۔ آئرلینڈ کے کپتان نے بھی انٹرویو میں کہا کہ یہ دن اور ٹاس کا جیتنا ان کے لیے لکی تھا۔

دوسری طرف بنگلہ دیش کے بولروں نے انڈیا کی منجھی ہوئی بیٹنگ لائن ڈھیر کرنے کے بعد بولروں کی پٹائی میں بھی کوئی کسر نہیں چھوڑی۔ لیکن اس جیت میں انڈیا کا قصور کم اور بنگلہ دیشیوں کی محنت زیادہ تھی۔ ان کے وارم اپ میچ میں نیوزی لینڈ کو ہرانے کے بعد ہی ایسا لگ رہا تھا کہ وہ ویسٹ انڈیز کوئی مقصد لے کر آئے ہیں۔ بولنگ، بیٹنگ اور فیلڈنگ ہر شعبے میں انہوں نے بہترین کارکردگی دکھائی اور آخر بہتر کھیلنے والی ٹیم جیت گئی۔ تاہم انڈیا کے پاس اب بھی موقع ہے کہ اپنی فارم میں واپس آ سکے۔ مگر بدقسمتی سے یہ موقع پاکستان کے پاس نہیں ہے۔

انڈیا بنگلہ دیش سے ہار گیا ہے اور پاکستان کپ سے باہر ہو گیا۔ میرے لیے یہ دن کرکٹ کا ’بلیک سیٹر ڈے‘ ہے۔