عبدالرشید شکور بی بی سی اردو ڈاٹ کام، ملتان

	انضمام ملتان میں ٹیم کے دوسرے کھلاڑیوں کے ساتھ

انضمام الحق کی اپنے آبائی شہر سے وابستہ یادوں کو پھر سے تازہ کرتے ہوئے کہتے ہیں ’بچپن میں جب میں اپنی حویلی کے صحن میں خاندان کے دوسرے بچوں کے ساتھ کرکٹ کھیلتا تھا تو وقفہ ہونے پر دال چاول اور حلیم سے ہماری تواضع ہوتی تھی‘۔

پاکستانی کرکٹ ٹیم کے کپتان سے جب میں نے پوچھا کہ چھبیس سال قبل ویسٹ انڈیز کی کرکٹ ٹیم ٹیسٹ کھیلنے ملتان آئی تھی تو کیا اس میچ کی کوئی یاد ہے؟ انضمام الحق بولے ’کیوں نہیں۔ وہ میچ دیکھنے میں قاسم باغ سٹیڈیم گیا تھا اور ویوین رچرڈز کو سنچری بناتے دیکھا تھا‘۔

کیا دوستوں کے ساتھ سٹیڈیم گئے تھے یا گھروالے لے گئے تھے؟ انضمام الحق کہتے ہیں ’بڑے بھائی انتظار الحق مجھے میچ میں لے گئے تھے۔

	ویوین رچرڈز نے ایک سو اکیس ٹیسٹ میچوں میں آٹھ ہزار پانچ سو چالیس رنز بنائے

انضمام الحق کہتے ہیں ’ملتان میں کھیلتے ہوئے بہت خوشی ہوتی ہے۔ لوگوں کی توقعات زیادہ ہونے کی وجہ سے پریشر ضرور ہوتا ہے لیکن کھیلنے میں مزا آتا ہے‘۔

پاکستانی کپتان نے ملتان میں کھیلے گئے چار ٹیسٹ میچوں میں دو سنچریاں اور دو نصف سنچریاں بنائی ہیں اور وہ ویسٹ انڈیز کے خلاف دوسرے ٹیسٹ میں بھی کارکردگی کے اس سلسلے کو جاری رکھنا چاہتے ہیں۔

انٹرنیشنل کرکٹ کی بے پناہ مصروفیات میں ملتان کے دوستوں کو کیسے یاد کرتے ہیں؟ انضمام الحق کا کہنا ہے ’یہ درست ہے کہ ان سے بہت کم ملنے کا موقع ملتا ہے لیکن وہ کبھی لاہور آجاتے ہیں اور میں ملتان جاؤں تو ان کے ساتھ بیٹھک ضرور ہوتی ہے‘۔