صلاح الدین بی بی سی اردو ڈاٹ کام، دلی

	سچن کندھے میں چوٹ کی وجہ سے ٹیم سے باہر تھے

سری لنکا میں چودہ اگست سے سہ فریقی ون ڈے سیریز شروع ہو رہی ہے جس میں میزبان سری لنکا کے علاوہ جنوبی افریقہ کی ٹیم بھی حصہ لے گی۔ اس ٹورنامنٹ کا فائنل میچ انتیس اگست کو کھیلا جائے گا۔

نئی ٹیم میں رابن اتھپا، انیل کمبلے اور وینوگوپال کو جگہ نہیں ملی ہے جبکہ
آل راؤنڈر دنیش مونگیا کو ایک بار پھر موقع دیا گیا ہے۔

سیکشن کمیٹی کے چئرمین کرن مورے نے ٹیم کا اعلان کرتے ہوئے کہا کہ سری لنکا اور ویسٹ انڈیز کے گزشتہ دوروں کی کار کردگی کے بنیاد پر کھلاڑیوں کو ٹیم میں شامل کیا گیا ہے۔

ایک سوال کے جواب میں کرن مورے نے کہا کہ انیل کمبلے سینئر اور تجربہ کار کھلاڑی ہیں اور انہیں مناسب موقع پر ٹیم میں شامل کیا جائےگا۔

دنیش مونگیا کے بارے میں ان کا کہنا تھا کہ کاؤنٹی کرکٹ میں ان کی کار کردگی اچھی رہی ہے اور ان کی بلے بازی اور بائیں ہاتھ سے سپن بالنگ ٹیم کے لیئے بڑی مفید ثابت ہوسکتی ہے۔

سچن تندولکر کی ٹیم میں واپسی کافی دنوں کے بعد ہوئی ہے۔ وہ کندھے میں چوٹ کی وجہ سے ٹیم سے باہر تھے اور کافی دنوں ٹیم میں واپسی کے لیئے کوشش کر رہے تھے۔

چوٹ سے قبل کئی میچوں میں ان کی کار کردگی اچھی نہیں تھی جس کی وجہ سے یہ سننے میں آ رہا تھا کہ سچن کا دور ختم ہوگیا ہے۔

شائقین اور کھیل کے تجزیہ کار سب ہی اس بات کے منتظر ہیں کہ ان کی دوبارہ واپسی کیسی رہے گی اور سری لنکا دورے میں سب کی نگاہیں سچن تندولکر کے کھیل پر ہی رہیں گی۔ سہ ملکی سیریز کا آغاز چودہ اگست سے ہوگا۔

سری لنکن سیریز کے لیئے انڈین ٹیم:

راہول ڈراوڈ ( کپتان)، وریندر سہواگ، سچن تندولکر، یووراج سنگھ، محمد کیف، سریش رینا، ایم ایس دھونی، عرفان پٹھان، رامیش پوار، ہری بھجن سنگھ، آجیت آکارکر، ایس سری ناتھ، دنیش مونگیا، مناف پٹیل اور آر پی سنگھ۔