عبدالرشید شکور بی بی سی اردو ڈاٹ کام، کراچی

	پاکستانی ہاکی ٹیم کے کپتان محمد ثقلین

محمد ثقلین کا کہنا ہے کہ ذرائع ابلاغ نے ان کی جو تصویر پیش کی ہے اصل صورتحال اس کے بالکل برعکس ہے۔ وہ جارحانہ انداز میں کھیلنے والے کھلاڑی ضرور ہیں جو اپنے ملک کو ہارتا نہیں دیکھ سکتا لیکن وہ جان میکنرو کی طرح بد دماغ نہیں ہیں اور نہ ہی انہوں نے کسی کھلاڑی کو دانستہ زخمی کیا ہے۔

محمد ثقلین کہتے ہیں کہ وہ بھی انسان ہیں اور ان میں یقیناً خامیاں ہیں لیکن ان کے بارے میں کوئی بھی رائے قائم کرنے سے پہلے ضروری ہے کہ تمام پہلوؤں کو مد نظر رکھا جائے۔

پاکستانی ہاکی ٹیم کے کپتان کا کہنا ہے کہ ان کی کوشش ہوتی ہے کہ فیلڈ میں کم سے کم غلطیاں کریں کیونکہ اس کا اثر یقیناً ٹیم پر پڑتا ہے لیکن ہاکی بہت تیز کھیل ہے جس میں کھلاڑی گرتے بھی ہیں اور زخمی بھی ہوتے ہیں۔ اگر حالیہ مقابلوں کا جائزہ لیں تو امپائرنگ بہت زیادہ پاکستان کے خلاف رہی ہے۔

پاکستانی کھلاڑیوں کے مقابلے میں یورپی کھلاڑی بہت زیادہ باڈی پلے اور رف کھیل کا مظاہرہ کرتے ہیں لیکن کارڈ پاکستانی کھلاڑیوں کو دکھائے جاتے ہیں۔
محمد ثقلین کہتے ہیں کہ کامن ویلتھ گیمز سے قبل آسٹریلیا کے ایک اخبار نے انہیں ہاکی کا ’بیڈ بوائے‘ قرار دیا لیکن گیمز کے بعد اسے اپنی رائے تبدیل کرنی پڑی تھی کیونکہ ان میچوں میں ان کے جسم کا کوئی حصہ ایسا نہیں تھا جہاں چوٹ نہ لگی ہو۔جس پر اس اخبار نے لکھا تھا کہ یہ وہ ثقلین تو خود مار کھانے والا کھلاڑی بن گیا ہے۔

ثقلین انگلینڈ کے ڈیوڈ بیکھم اور رونی کی مثالیں دیتے ہوئے کہتے ہیں کہ بیکھم ٹھنڈے مزاج کا کھلاڑی مشہور ہے لیکن سپینش لیگ میں اسے چار ریڈ کارڈ دکھائے گئے۔ رونی میدان میں جارحانہ مزاج کا کھلاڑی ہے جسے کئی مرتبہ کارڈ دکھائے جاچکے ہیں لیکن اس کا مطلب یہ نہیں کہ یہ منفی طرز عمل کے کھلاڑی ہیں۔

پاکستانی کپتان کےلئے آنے والے دن بہت اہم ہیں کیونکہ ایک جانب ٹیم کی عمدہ کارکردگی سخت چیلنج سے کم نہیں تو دوسری جانب ثقلین کو مثبت انداز اختیار کرنے کے وعدے کی پاسداری کرنی ہے یہ وعدہ انہوں نے خود اپنے آپ سے کیا ہے۔