عبدالرشید شکور بی بی سی اردو ڈاٹ کام، کراچی

	ہاکی ٹیم چھ سال میں کوئی بھی بڑا ٹائٹل جیتنے میں کامیاب نہیں ہوسکی

سینٹ کی سپورٹس سے متعلق سٹینڈنگ کمیٹی نے پاکستان ہاکی فیڈریشن کے صدر طارق کرمانی اور سیکریٹری مسرت اللہ کو بھی طلب کیا تھا لیکن یہ دونوں اجلاس سے غائب تھے۔

اولمپئن سمیع اللہ کا کہنا تھا کہ پاکستان ہاکی کے معاملات چلانے کے لیئے دیانتدار اور پروفیشنل افراد کی ضرورت ہے۔

انہوں نے کہا کہ پاکستان ہاکی فیڈریشن ہاکی کی ترقی کے نام پر چھ سال کے عرصے میں80 کروڑ روپے خرچ کرچکی ہے لیکن میدان خالی پڑے ہیں اور ٹیم کی کارکردگی سب کے سامنے ہے۔

اولمپئن اصلاح الدین کا کہنا تھا کہ فیڈریشن نے سابق اولمپئنز کی تجاویز پر کبھی عمل نہیں کیا۔ انہوں نے کہا کہ موجودہ کارکردگی دیکھ کر یہ اندازہ لگانا مشکل نہیں ہے کہ اس ٹیم کے ساتھ کوئی بھی بڑا ٹورنامنٹ نہیں جیتا جاسکتا۔

سمیع اللہ نے بعدازاں بی بی سی سے بات کرتے ہوئے اس بات پر تعجب کا اظہار کیا کہ پاکستان ہاکی فیڈریشن ایک طرف تو سینئر ٹیم کی ذمہ داری فرد واحد کے سپرد کرچکی ہے اور دوسری جانب جونیئر ہاکی ٹیم کے لیئے منظورجونیئر کو منیجر اور قمرابراہیم کو کوچ مقرر کیا ہے۔ اگر فیڈریشن کے نزدیک ایک ہی شخص کو ٹیم کے معاملات سپرد کرنا اچھی بات ہے تو پھر اس پالیسی کو جونیئر ٹیم میں کیوں نہیں اپنایا گیا؟

پاکستان کے سابق اولمپئنز کی بڑی تعداد پاکستان ہاکی فیڈریشن کے سیکریٹری پر تنقید کرتی آئی ہے جو چھ سال سے اس عہدے پر فائز ہیں لیکن اس عرصے میں پاکستانی ٹیم کوئی بھی بڑا ٹائٹل جیتنے میں کامیاب نہیں ہوسکی ہے۔

پاکستان ہاکی فیڈریشن نے قومی ہاکی کے معاملات چلانے کے لیئے جو بارہ رکنی ایڈوائزری بورڈ قائم کررکھا ہے اس کے ایک رکن سابق اولمپئن خواجہ ذکاء الدین نے استعفیٰ دیا ہے۔