مناء رانا بی بی سی اردو ڈاٹ کام لاہور

	چیف سلیکٹراختر رسول نے ٹیم کا چناؤ مینجمنٹ کے ساتھ مشورے کے بعد کیا

ٹیم کا اعلان خلاف معمول بغیر کسی ٹرائل کے کیا گیا ہے۔

پاکستان ہاکی فیڈریشن کے سیکریٹری بریگیڈیئر ریٹائرڈ مسرت اللہ خان کا کہنا ہے کہ چونکہ کامن ویلتھ گیمز اور ورلڈ کوالیفائنگ راؤنڈ کے درمیان بہت کم دنوں کا وقفہ تھا اس لیے کامن ویلتھ سے پہلے ہی دونوں ٹورنامنٹس کے لیے ٹیم طے کر لی گئی تھی۔

انہوں نے کہا کہ دولت مشترکہ کھیلوں کے دوران اور جاری کیمپ میں کھلاڑیوں کا بہت باریک بینی سے جائزہ لیا گیا ہے لہذا کسی باقائدہ ٹرائل کی ضرورت محسوس نہیں کی گئی۔

انہوں نے کہا کہ چیف سلیکٹراختر رسول نے ٹیم مینجمنٹ کے ساتھ مشورے کے بعد ٹیم کا انتخاب کیا ہے۔

دولت مشترکہ کے لیے ٹیم سولہ کھلاڑیوں پر مشتمل تھی جبکہ ورلڈ کوالیفائنگ راؤنڈ کے لیے ٹیم اٹھارہ رکنی ہے اور اس میں دو نئے فارورڈز وقاص شریف اور وقاص اکبر شامل کیے گئے ہیں۔

دولت مشترکہ کھیلوں میں ہاف بیک غضنفر علی شامل نہیں تھے کیونکہ وہ ان دنوں لیگ کھیلنے میں مصروف تھے۔ اب وہ ٹیم کے لیے دستیاب ہیں اس لیئے انہیں شامل کر لیا گیا ہے۔

فارورڈ طارق عزیز چھ ماہ کی پابندی کی سزا کے سبب ٹیم میں شامل نہیں ہیں۔
ورلڈ کپ کوالیفائنگ راؤنڈ میں 12 ٹیمیں شرکت کر رہی ہیں جنہیں دو پولز میں تقسیم کیا گیا ہے۔ پاکستان پول اے میں ہے جس میں پاکستان کے علاوہ بیلجیم، کینیڈا،مصر، انگلینڈ اور آئر لینڈ کی ٹیمیں شامل ہیں۔

ورلڈ کپ کوالیفائنگ راؤنڈ کی پہلی پانچ پوزیشنز حاصل کرنے والی ٹیمیں ورلڈ کپ کھیلنے کی اہل ہوں گی، جو اس سال کے آخر میں جرمنی میں کھیلا جائے گا۔
ٹیم ان کھلاڑیوں پر مشتمل ہے:

گول کیپرز: سلمان اکبر، ناصر علی
فل بیکس:زیشان اشرف،محمد عمران،عمران وارثی،
ہالف بیک : غضنفر علی، محمد ثقلین (کپتان)، دلاور حسین، عدنان مقصود، ساجد انور۔
فارورڈز:ریحان بٹ،مدثر علی خان، شکیل عباسی،محمد زبیر،محمد شبیر،عدنان ذاکر،وقاص شریف اور وقاص اکبر۔