عبدالرشید شکور
بی بی سی اردو ڈاٹ کام کراچی |  |
|  چوتھی کامن ویلتھ باکسنگ چیمپئن شپ میں پاکستان کے باکسروں کا اسکواڈ بھی حصہ لے رہا ہے |
چوتھی کامن ویلتھ باکسنگ چیمپئن شپ پیر سےاسکاٹ لینڈ کےشہر گلاسگومیں شروع ہورہی ہے جس میں پاکستان کا پانچ باکسروں پرمشتمل اسکواڈ بھی حصہ لے رہا ہے۔ اس اسکواڈ میں اصغر علی شاہ، مہراللہ، حیات اللہ، علی محمد اور نعمان کریم شامل ہیں۔ نعمان کریم کی ایک سال بعد انٹرنیشنل رنگ میں واپسی ہورہی ہے۔ گـزشتہ سال سیف گیمز کی ڈوپنگ میں وہ ممنوعہ ادویہ استعمال کرنے کے مرتکب پائے گئے تھے جس پر انہیں ایک سال کی پابندی کا سامنا کرنا پڑا تھا۔ نعمان کریم کہتے ہیں کہ گردے کی تکلیف دور کرنے کی دوا استعمال کرنے کی انہیں بھاری قیمت چکانی پڑی۔ انہیں قطعًا اندازہ نہیں تھا کہ میڈیکل اسٹور سے لی گئی دوا ان کے کریئر کو متاثر کردے گی۔ نعمان کریم جو ورلڈ باکسنگ چیمپئن شپ میں کانسی کا تمغہ جیتنے کے علاوہ متعدد بین الاقوامی مقابلوں میں تمغے جیت چکے ہیں۔ ان کا کہنا ہے کہ ہر باکسر کی خواہش ہوتی ہے کہ وہ اولمپکس میں اپنے ملک کی نمائندگی کرے۔ ایتھنز اولمپکس میں حصہ نہ لینے کا انہیں افسوس ہے وہ اس سال نومبر میں ہونے والی عالمی چیمپئن شپ پر نگاہ جمائے بیٹھے ہیں اور چاہتے ہیں کہ رنگ میں ایک سالہ غیرحاضری کی تلافی اچھی کارکردگی سے کریں۔ نعمان کریم کا کہنا ہے کہ یہ چیمپئن شپ ان کے لیے تربیتی دورہ ہے وہ فٹ ہیں انہیں میچ پریکٹس کی ضرورت ہے۔ تین سال قبل کوالالمپور میں ہونے والی تیسری کامن ویلتھ باکسنگ چیمپئن شپ میں نعمان کریم نے چاندی کا تمغہ جیتا تھا جبکہ مہراللہ اور اصغرعلی شاہ نے گولڈ میڈل جیتے تھے ۔
| 
یہ صفحہ دوست کو ای میل کیجیئے
پرِنٹ کریں
