عبدالرشید شکور بی بی سی اردو ڈاٹ کام کراچی

پاکستانی باکسر

نعمان کریم ایک سال تک کسی بین الاقوامی باکسنگ مقابلے میں شرکت کے اہل نہیں ہونگے ۔

نعمان کریم نے جن کا تعلق پاکستان آرمی سے ہے، اعتراف کیا ہے کہ انہوں نے سیف گیمز کے دوران وزن کم کرنے کے لئے ایک مقامی ڈاکٹر کے مشورے سے دوا استعمال کی تھی جو انٹرنیشنل اولمپک کمیٹی کے قواعد وضوابط کے تحت ممنوعہ ادویات کی فہرست میں شامل ہے ۔

سیف گیمز میں نعمان کریم کا ڈوپ نمونہ لیاگیا تھا جسے ممبئی کی لیبارٹری میں بھیجا گیا تھا جس کا نتیجہ مثبت نکلا اس بارے میں پاکستان باکسنگ فیڈریشن کو مطلع کردیا گیا ہے ۔

یہ پہلا موقع ہے کہ کسی پاکستانی باکسر کا ڈوپ ٹیسٹ مثبت ثابت ہوا ہے ۔

نعمان کریم کے علاوہ ان کے بڑے بھائی فیصل کریم اور ایشین گیمز گولڈ میڈلسٹ مہراللہ کو افیون اورچرس استعمال کرنے پر سخت الفاظ میں وارننگ مل چکی ہے ۔

نعمان کریم نے گزشتہ سال بنکاک میں ہونے والی ورلڈ چیمپئن شپ میں کانسی کا تمغہ جیتا تھااور اس سال فلپائن میں اولمپک کوالیفائنگ مقابلے میں سونے کا تمغہ جیتنے میں کامیاب ہوئے تھے ۔