زخمی بالاجی کی جگہ اجیت اگرکر کو کھیلنے کا موقع

بھارت کے کرکٹ کنٹرول بورڈ نے بالاجی کی جگہ اجیت اگرکار کو ٹیم میں شامل کرنے کا اعلان کیا ہے۔ اجیت اگرکار نے 134 میچوں میں 203 وکٹ لیے ہیں۔

آخری مرتبہ انہوں نے دسمبر میں بنگلہ دیش کی ٹیم کے خلاف میچ کھیلا تھا۔

بورڈ کے سیکریٹری ایس کے نائر نے بتایا ’بالاجی کی پسلی میں چوٹ ہے اس لئے وہ اگلےسات دن تک نہیں کھیل سکتے‘۔

مسٹر نائر نے بتایا کہ 9 اپریل کو جمشید پور میں اور احمدآباد میں 12 اپریل کو ہونے والے میچوں کے لئے اجیت اگرکار کو ٹیم میں رکھا جا رہا ہے۔

انہوں نے یہ بھی بتایا کہ پاکستان کے خلاف ایک روزہ میچوں میں بھارت کی ٹیم کے کھلاڑیوں کی تعداد بڑھا کر 15 کر دی گئی ہے۔یعنی بالاجی بھی ٹیم میں شامل رہیں گے۔

بھارت کوچین اور وشاکھا پٹنم کے میچ جیت کر چھ ایک روزہ میچوں کی سریز میں صفر کے مقابلے دو کی سبقت حاصل کر چکا ہے۔