عبدالرشید شکور بی بی سی اردوڈاٹ کام موہالی

کرکٹ کاغذوں پر نہیں بلکہ میدان میں کھیلی جاتی ہے

پیر کو موہالی کرکٹ اسٹیڈیم میں پرہجوم پریس کانفرنس میں بھارتی کپتان نے کہا کہ پاک بھارت کرکٹ ’ایشز‘ سے بڑی کرکٹ ہے لہذا دباؤ دونوں ٹیموں پر ہوگا۔

سوروگنگولی نے کہا کہ پہلے ٹیسٹ کے بارہ کھلاڑیوں میں اشیش نہرا اور یوراج سنگھ شامل نہیں ہیں جس کا مطلب یہ ہوگا کہ پیس اٹیک عرفان پٹھان، بالاجی اور ظہیرخان پر مشتمل ہوگا اور اسپن بولنگ میں کمبلے کو ہربھجن سنگھ پر فوقیت دیے جانے کی توقع ہے۔

بھارتی کپتان نے کہا کہ ان کی ٹیم متوازن ہے لیکن پاکستانی ٹیم کو وہ کسی صورت نظرانداز نہیں کرسکتے کیونکہ کرکٹ کاغذ پر نہیں بلکہ میدان میں کھیلی جاتی ہے۔

گنگولی کا کہنا تھا کہ یہ درست ہے کہ پاکستان نے حالیہ ون ڈے میچوں میں بھارت کو ہرایا ہے لیکن ٹیسٹ کرکٹ مختلف بات ہے۔ انہوں نے کہا کہ ٹیسٹ کرکٹ کا مزاج تبدیل ہوگیا ہے اور میچز کے فیصلے ہوجاتے ہیں۔ پاکستانی کوچ باب وولمر کی صلاحیتوں کے بارے میں کیے گئے سوال پر گنگولی نے کہا کہ اس میں شک نہیں کہ وولمر اچھے کوچ ہیں لیکن میدان میں سب کچھ کھلاڑیوں پر منحصر ہوتا ہے۔

موہالی کی وکٹ کے بارے میں ان کا کہنا تھا کہ وہ اس سے خوش ہیں۔

پاکستانی کپتان انضمام الحق نے کہا کہ بھارتی ٹیم کے پاس تجربہ کار کھلاڑی ہیں لیکن ان کی ٹیم جیتنے کی صلاحیت رکھتی ہے۔ انہوں نے کہا کہ چونکہ ان کی ٹیم میں زیادہ تر نوجوان کھلاڑی شامل ہیں لہذا بحیثیت کپتان ان پر بھاری ذمہ داری عائد ہوتی ہے۔

انضمام الحق نے باب وولمر کی کارکردگی کے بارے میں کیے گئے سوال کے جواب میں کہا کہ وولمر ٹیم کی بہتری کے لیے کچھ نہ کچھ کرتے رہتے ہیں اور ان کا رویہ بھی کھلاڑیوں کے ساتھ دوستانہ رہا ہے۔

دانش کنیریا کے بارے میں انضمام الحق کہتے ہیں کہ اس وقت وہ سب سے کامیاب بولر ہیں اور اس میں اتنی صلاحیت ہے کہ وہ تنہا ہی میچ جتواسکتے ہیں۔ انضمام الحق نے کہا کہ شعیب اختر کی کمی محسوس ضرور ہوگی لیکن دیگر بولرز بھی موثر ہیں۔

پاکستان کی موجودہ ٹیم میں انضمام الحق، یوسف یوحنا اور شاہدآفریدی تین ایسے کھلاڑی ہیں جو اس سے قبل بھارت میں ٹیسٹ کھیل چکے ہیں۔