عبدالرشید شکور بی بی سی اردو ڈاٹ کام، موہالی

انیل کمبلے نے دوسری اننگز میں پاکستان کے اہم ترین بلے بازوں کو آؤٹ کیا ہے

اس وقت عبدالرزاق بائیس جبکہ کامران اکمل نو رن پر کھیل رہے ہیں۔پاکستان کو اس وقت ترپّن رنز کی برتری حاصل ہو چکی ہے ۔

آخری آؤٹ ہونے والے کھلاڑی عاصم کمال تھے جو اڑتالیس رن بنا کر آوٹ ہوئے۔

پاکستان کی دوسری اننگز کا آغاز تباہ کن تھا۔ آؤٹ ہونے والے پہلے کھلاڑی توفیق عمر تھے انہوں نے چار رنز بنائے۔ یونس خان ایک اور سلمان بٹ پانچ رنز بنا سکے۔یوسف یوحنا اڑسٹھ رن بنا کر آؤٹ ہوئے۔

امپائر ڈیرل ہیئر نے کپتان انضمام الحق کوچھیاسی کے انفرادی اسکور پر انیل کمبلے کی گیند پر ایل بی ڈبلیو آؤٹ قرار دیا گیا۔ انضمام الحق نے یوسف یوحنا کے ساتھ چوتھی وکٹ کی شراکت میں ایک سو انتالیس رنز کا اضافہ کیا۔

یہ چوتھی وکٹ کے لیے ان دونوں بلے بازوں کی مجموعی طور پر آٹھویں سنچری شراکت تھی جو کہ ایک عالمی ریکارڈ ہے اس سے قبل چوتھی وکٹ کے لیے کسی ایک جوڑی کی سب سے زیادہ سات سنچری شراکتوں کا ریکارڈ اسٹیو وا اور مارک وا کا تھا۔

بھارت کی جانب سے بالا جی نے تین، انیل کمبلے نے دو جبکہ عرفان پٹھان نے ایک وکٹ حاصل کی۔ پاکستان کو بھارت پر اس وقت چوالیس رنز کی برتری حاصل ہے جبکہ اس کے چار وکٹیں باقی ہیں۔

اس سے پہلے بھارتی ٹیم پانچ سو سولہ رنز بنا کر آؤٹ ہو گئی۔ پاکستان کی جانب سے دانش کنیریا نے چھ وکٹیں حاصل کی۔ چوتھے روز آؤٹ ہونے والے تمام کھلاڑیوں کو دانش کنیریا نے ہی آؤٹ کیا۔

کھیل کے چوتھے دن وی وی ایس لکشمن نے اپنی نصف سنچری مکمل کی۔ وہ اٹھاون رن بنا کر آؤٹ ہوئے۔کھیل کے چوتھے روز دانش کنیریا نے عرفان پٹھان کی وکٹ جلد ہی حاصل کر لی لیکن بعد ازاں بالا جی نے جارحانہ انداز میں بیٹنگ کرتے ہوئے اکتیس رنز بنائے۔

پاکستان نے اپنی پہلی اننگز میں تین سو بارہ رنز سکور کیے تھے جن عاصم کمال کے اکانوے رنز بھی شامل ہیں۔

بھارت وریندر سہواگ کی سینچری کی بدولت اپنی پہلی اننگز میں بڑا سکور کرنے میں کامیاب ہو گیا۔ سہواگ کی شاندار سنچری اور سچن تندولکر کی چورانوے رنز کی عمدہ اننگز کے نتیجے میں بھارت کو مجموعی طور پر پاکستان پر دو سو چار رنز کی سبقت حاصل ہو گئی تھی۔

موہالی ٹیسٹ کی دونوں ٹیمیں یہ ہیں۔

پاکستان۔ انضمام الحق ( کپتان) سلمان بٹ، توفیق عمر، یونس خان ، یوسف یوحنا، عاصم کمال، عبدالرزاق، کامران اکمل، محمد سمیع، رانا نویدالحسن اور دانش کنیریا۔

بھارت۔ سوروگنگولی ( کپتان) وریندر سہواگ، گوتم گمبھیر، راہول ڈریوڈ، سچن ٹنڈولکر، وی وی ایس لکشمن، دنیش کارتھک، عرفان پٹھان، انیل کمبلے، ظہیرخان اور بالاجی۔