’دونوں ٹیموں کے درمیان فرق تجربے کا ہے‘

انہوں نے اس بات کو دہرایا کہ وہ کھیل کے جذبے سے بھارت آئے ہیں اور ان کی کوشش ہوگی کہ ٹیم بہتر کھیل کا مظاہرہ کرے۔

ہندوستان اور پاکستان کے درمیان کرکٹ سیریز کی شروعات میں اب صرف چند گھنٹے بچے ہیں۔ منگل کی صبح سے کھیلے جانے والے پہلے ٹیسٹ کے لیے دونوں ٹیموں نے موہالی پہنچ کر پریکٹس کی۔

نامہ نگاروں سے بات چیت کرتے ہوۓ انضمام نے کہا کہ جو ٹیم ٹاس جیتے گی وہی پہلے بیٹنگ کرے گی۔ ان کا کہنا تھا کہ پچ بالروں کے لیے اچھی ہے لیکن اگر بلے باز تھوڑی توجہ سے کھیلیں تو رنز بھی بنیں گے۔

انضمام کا کہنا تھا کہ ہندوستانی ٹیم کے مقابلے میں ان کی ٹیم کو زیادہ فیورٹ نہیں مانا جا رہا ہے لیکن ان کی ٹیم میں صلاحیت کی کمی نہیں ہے۔ انہوں نے کہا ’ دونوں ٹیموں کے درمیان فرق یہ ہے کہ ہندوستانی ٹیم تجربات سے پر ہے اور پاکستانی کھلاڑی نئے ہیں اور اسی لیے ٹیم کے سینیئر کھلاڑیوں پر ذمہ داریاں زیادہ ہیں‘۔

پاکستانی ٹیم کے کوچ باب وولمر کا کہنا تھا کہ اگر پاکستان کو سیریز جیتنی ہے تو بلے بازوں کو وکٹ پر زیادہ دیر تک رکنا ہوگا۔ انہوں نے موہالی پچ پر کسی بھی تبصرے سے گریز کیا اور کہا کہ ابھی کچھ بھی نہیں کہا جا سکتا ہے۔

موہالی ٹیسٹ میچ دیکھنے لیے دوہزار سے زائد پاکستانی شائقین پہنچ چکے ہیں۔ اس سیریز میں وہ دلچسپی تو دیکھنے کو نہیں مل رہی ہے جوگزشتہ برس ہندوستانی ٹیم کے پاکستان دورے میں دیکھنے کو ملی تھی لیکن لوگوں میں جوش وخروش ہے اور امید ہے کہ جیسے جیسے سیریز آگے بڑھے گی اس میں مزید دلچسپی پیدا ہوتی جائے گی۔