عبدالرشید شکور بی بی سی اردو ڈاٹ کام، موہالی

’انضمام اور یوحنا کوذمہ داری اٹھانا ہو گی‘

انتخاب عالم ان دنوں بھارتی پنجاب کی کرکٹ ٹیم کے کوچ کی حیثیت سے موہالی میں مقیم ہیں۔ بی بی سی سے بات کرتے ہوئے انتخاب عالم نے کہا کہ نوجوان کھلاڑیوں کو ون ڈاؤن پوزیشن پر کھلا کر قربانی کا بکرا بنا دیا جاتا ہے۔

انضمام الحق اور یوسف یوحنا تجربہ کار بیٹسمین ہیں اور انہیں ذمہ داری کا ثبوت دیتے ہوئے نمبر تین اور چار پر بیٹنگ کرنی ہوگی کیونکہ نئے نوجوان کھلاڑی ناتجربہ کاری میں وکٹیں گنوا دیتے ہیں اور ٹیم دباؤ میں آجاتی ہے۔

انتخاب عالم کہتے ہیں کہ انہوں نے اس سے قبل پاکستانی ٹیم میں اتنے زیادہ تجربے نہیں دیکھے۔ موہالی کی وکٹ کے بارے میں انتخاب عالم کا کہنا ہے کہ یہ تیز وکٹ ہے لیکن اس پر جوش سے زیادہ ہوش کے ساتھ نپی تلی بولنگ کرنی ہوگی۔

ان کا یہ بھی کہنا تھا کہ اس وکٹ پر سلپ میں کیچز نکلیں گے لہذا فیلڈنگ پر بھی بہت دارومدار ہوگا جبکہ اس وکٹ پر وہی بیٹسمین کامیاب ہوگا جس کی تکنیک درست ہوگی۔

انتخاب عالم کہتے ہیں کہ شعیب اختر کی کمی یقیناً محسوس ہوگی۔ ان کا کہنا ہے کہ عبدالرزاق سے انہیں بڑی امیدیں وابستہ تھیں لیکن اس کی کارکردگی ایک جگہ آ کر ٹھہر گئی ہے اسی طرح محمد سمیع بھی فٹنس مسائل کےسبب مستقل مزاجی کا مظاہرہ کرنے میں کامیاب نہیں ہوسکیں ہیں۔

انتخاب عالم کے خیال میں نوجوان کھلاڑیوں کے لیے سنہری موقع ہے کہ وہ اپنے آپ کو منوائیں۔ اس سوال پر کہ یہ اطلاعات تھیں کہ پاکستانی ٹیم موہالی ٹیسٹ کے لیے ان سے رہنمائی حاصل کرے گی انتخاب عالم نے کہا کہ ان سے کسی نے رابطہ قائم نہیں کیا لیکن اگر ٹیم کو ان کے مشوروں کی ضرورت ہوئی تو انہیں پاکستانی ٹیم کی مدد کر کے خوشی ہوگی۔