عبدالرشید شکور
بی بی سی اردو ڈاٹ کام، موہالی |  |
|  عاصم کمال نے شاندار بلے بازی کا مظاہرہ کیا ہے |
پاکستان نے موہالی ٹیسٹ کے پہلے دن ستتراوورز میں دو سو چھہتر رنز بنائے ہیں اور اس کے سات کھلاڑی آؤٹ ہوئے ہیں۔عاصم کمال اناسی جبکہ محمد سمیع سولہ رن پر کھیل رہے ہیں۔ پاکستان کے آخری آؤٹ ہونے والے کھلاڑی کامران اکمل تھے جو پندرہ رن بنا کر کمبلے کی گیند پر آؤٹ ہوئے۔
سورو گنگولی نے ٹاس جیت کر پہلے پاکستان کو بیٹنگ دی لیکن اوپنرز سلمان بٹ اور توفیق عمر اچھا آغاز نہ دے سکے۔ سلمان بٹ صرف پانچ رنز بناکر عرفان پٹھان کی ان سوئنگ پر بولڈ ہوگئے۔ اس وقت پاکستان کا مجموعی سکور گیارہ تھا۔ تیس کے مجموعی اسکور پر نائب کپتان یونس خان ظہیرخان کی گیند پر ایل بی ڈبلیو ہوگئے وہ صرف نو رنز بناسکے۔ توفیق عمر جو گزشتہ سال بھارت کے خلاف پنڈی ٹیسٹ کے بعد دوبارہ ٹیسٹ ٹیم میں شامل کیے گئے ہیں چوالیس رن بناکر بالاجی کی گیند پر بولڈ ہوگئے۔ یوسف یوحنا چھ رن بنا سکے انہیں عرفان پٹھان نے آؤٹ کیا۔ کپتان انضمام الحق نے ستاون رن بنائے انہیں انیل کمبلے نے پر ایل بی ڈبلیو آؤٹ کیا۔عبدالرزاق چھبیس رن بنا کر بالا جی کی گیند پر کارتک کے ہاتھوں کیچ آؤٹ ہوئے۔ بھارت کی جانب سے عرفان پٹھان، انیل کمبلے اور بالا جی نے دو دو جبکہ ظہیر خان نےایک وکٹ حاصل کی ہے۔ میچ کے امپائرز آسٹریلیا کے ڈیرل ہیئر اور جنوبی افریقہ کے روڈی کرٹزن ہیں جبکہ انگلینڈ کے کرس براڈ میچ ریفری ہیں۔ موہالی ٹیسٹ کی دونوں ٹیمیں یہ ہیں۔ پاکستان۔ انضمام الحق ( کپتان) سلمان بٹ، توفیق عمر، یونس خان ، یوسف یوحنا، عاصم کمال، عبدالرزاق، کامران اکمل، محمد سمیع، رانا نویدالحسن اور دانش کنیریا۔ بھارت۔ سوروگنگولی ( کپتان) وریندر سہواگ، گوتم گمبھیر، راہول ڈریوڈ، سچن ٹنڈولکر، وی وی ایس لکشمن، دنیش کارتھک، عرفان پٹھان، انیل کمبلے، ظہیرخان اور بالاجی۔
| 
یہ صفحہ دوست کو ای میل کیجیئے
پرِنٹ کریں
