صلاح الدین بی بی سی اردو ڈاٹ کام، دلی

پاکستان کرکٹ بورڈ کا دو رکنی وفد آئندہ سیریز کے سلسلے میں میچوں کے انعقاد کے مقامات اور سٹیڈیمز کا جائزہ لینے کے لیے ہندوستان کے دورے پر ہے۔ اتوار کے روز پی سی بی کے جنرل مینیجر آپریشنز ذاکر خان اور سپیشل سپریٹنڈنٹ آف پولیس سہیل خان نے کانپور کے گراؤنڈ کا معائنہ کرنے کے بعد کہا ہے کہ سٹیڈیم کی اسٹوڈینٹ اور پبلک گیلری و چار دیواری کی حالت خراب ہے۔

ذاکر خان کا کہنا تھا کہ کسی رخنہ کے بغیر میچ کرانا انتظامیہ کی ذمہ داری ہے۔ انہوں نے کہا ’یہ مقامی انتظامیہ کی ذمہ داری ہے کہ کھیل کے دوران کوئی ناخوشگوار واقعہ نہ ہونے پائے۔ اگر کچھ ہوا تو لوگ زخمی ہو سکتے ہیں یا پھر دیگر حادثات کا بھی اندیشہ ہے۔‘

بعض اطلاعات کے مطابق گرین پارک سٹیڈیم کا ڈریسنگ روم بھی اطمینان بخش حالت میں نہیں ہے۔

پاکستانی وفدگراؤنڈز کے علاوہ سیکیورٹی انتظامات کا بھی جائزہ لے رہا ہے۔ وفد اب تک بیشتر مقامات کا دورہ کر چکا ہے۔ سب سے زیادہ فکر احمدآباد کے متعلق تھی جہاں دونوں ٹیموں کے درمیان ایک ٹیسٹ میچ کھیلنے کی تجویز ہے۔

احمدآباد میں سن دو ہزار دو میں فرقہ وارانہ فسادات کے سبب حالات اب بھی کشیدہ ہیں۔ لیکن اطلاعات کے مطابق پاکستانی وفد نے وہاں سیکیورٹی انتظامات پر اطمینان ظاہر کیا ہے۔