رفعت جاوید بی بی سی اردو ڈاٹ کام ایتھنز، یونان

جدید اولمپکس میزبان 1896 کا ایتھنز

تاہم جدید اور قدیم اولمپکس کے درمیان فرق کو دیکھنے اور محسوس کرنے والا شاید آج کوئی بھی بقید حیات نہیں ہو گا لیکن اس فرق سے کوئی انکار نہیں کر سکتا کہ اس سال کے اولمپکس میں جو سکیورٹی کے انتظامات کیے گئے ہیں ان کی ماضی میں کوئی نظیر نہیں ملتی۔

ایتھنز ایئرپورٹ سے باہر نکلتے ہی اس بات کا اندازہ لگانے میں کوئی دشواری نہیں ہوتی کہ یہ شہر اولمپکس کھیلوں کی میزبانی کر رہا ہے لیکن اس کے ساتھ ہی یہ بات واضح ہونے بھی زیادہ دیر نہیں لگتی کہ یہ شہر اولمپکس کا میزبان کم اور جنگ کا میدان زیادہ نظر آتا ہے۔

اور آخر ایسا کیوں نہ لگے۔ خود منتظمین کے الفاظ میں اس بار دنیا بھر کے ساڑھے دس ہزار کھلاڑیوں کی حفاظت کے لیے ستر ہزار سکیورٹی اہلکاروں کو تعنیات کیا گیا ہے۔ یعنی اس مرتبہ ایک کھلاڑی کی حفاظت پر سات اہلکار دکھائی دیں گے۔

ستر ہزار کی اس تعداد میں وہ امریکی اور برطانوی فوجی شامل نہیں ہیں جنہیں اپنے اسلحہ سمیت یونان آنے کی اجازت دی گئی ہے۔

خواہ اولمپکس گاؤں ہو یا پھر پریس سنٹر، ایتھنز میں اولمپکس کے تمام اہم مقامات پر لوگوں کی میٹل ڈیٹیکٹر سے تلاشی لی جا رہی ہے اور ان میں ذرائع ابلاغ کے نمائندے ہی نہیں خود کھلاڑی بھی شامل ہیں۔

ظاہر ہے منتظمین اس مرتبہ کوئی بھی خطرہ مول لینا نہیں چاہتے۔

کھیل کے دوران شدت پسند عناصر کہیں میزائلوں سے حملہ نہ کریں، اس کے لئے ایتھنز کے تین حصوں میں امریکی میزائل شکن پیٹریئٹ میزائل نصب کئے گئے ہیں۔

ایتھنز میں جدید تر حفاظتی آلات بھی استعمال کیے جا رہے ہیں

ادھر نیٹو کے دو ممالک چیک جمہوریہ اور ہنگری نے جوہری اور حیاتیاتی ہتھیاروں کے اپنے سو ماہرین کی ٹیم بھی یونان بھیجنے کا فیصلہ کیا جو اینتھریکس سے حملے کی فوراً نشاندہی کر کے مناسب کارروائی کرنے کے اہل ہوں گے۔