 |  ایتھنز میں سٹیڈیم کا منظر |
بین الاقوامی اولمپک کمیٹی (آئی او سی) نے تصدیق کی ہے کہ ایتھنز گرمائی اولمپک کھیلوں کی میزبانی کر سکے گا۔ یہ کھیل تیرہ اگست سے یونان کے دارالحکومت میں شروع ہو رہے ہیں۔ آئی او سی کے چیف اوور سیئر ڈینس آسولڈ نے کہا ’ہمیں بعض مقامات اور انتظامی ڈھانچے کے بارے میں شبہہ تھا۔ لیکن مجھے بہت خوشی ہے کہ یہ تمام مسائل ختم ہو گئے ہیں۔ اب کسی بات کا خطرہ نہیں رہا اور سب کچھ صحیح وقت پر ہو گا‘۔ انہوں نے انسپکٹروں کے دوروں کو ’مثبت‘ قرار دیتے ہوئے سٹیڈیم کی چھت کے کام میں ہونے والی پیش رفت کو سراہا۔ آسولڈ نے کہا کہ ان کھیلوں کا ایتھنز میں انعقاد یونانی عوام اور اولمپک مہم کے لئے مفید ثابت ہوں گا۔ ایتھنز میں منتظم گروہ کی سربراہ جیانا ڈسکالاکی نے کھیلوں کے وقت پر انعقاد کے سلسلے میں مقامی کارکنوں اور محنت کشوں کی کاوشوں کو سراہا ہے۔ انہوں نے کہا کہ کارکنوں کی محنت کے سبب سات برس کا کام چار برس میں مکمل ہو جائے گا جس سے یہ بات واضح ہوتی ہے کہ یونانی قوم جس بات کا تہیہ کر لیتی ہے، کر دکھاتی ہے۔ توقع ہے سٹیڈیم کی اٹھارہ ہزار ٹن وزنی چھت کا کام اپریل کے اختتام تک مکمل کر لیا جائے گا۔ | 
یہ صفحہ دوست کو ای میل کیجیئے
پرِنٹ کریں
