اولمپک کمیٹی کے صدر یونان کے وزیراعظم سے بھی ملیں گے۔

اولمپک گیمز اس ماہ کی تیرہ تاریخ کو شروع ہونے والی ہیں اور انتیس اگست کو اختتام پزیر ہونگی۔

بین الاقوامی اولمپک کمیٹی کے صدر نے اپنے خیالات کا اظہار اولمپکس شروع ہونے سے نو دن پہلے یونان کے دارالحکومت پہنچنے کے بعد کیا۔

انہوں نے کہا کہ یہ سات سال کی محنت اور تیاری کا نتیجا ہے۔ انہوں نے کہا کہ اولمپک کمیٹی کو یونان کی تیاری پر پورا بھروسہ ہے۔

ایتھنز میں روخے کا خیرمقدم ایتھنز گیمز کمیٹی کے سربراہ اور یونانی اولمپک کمیٹی کے صدر نے کیا تھا۔

اطلاعات کے مطابق مسٹر روخے یونان کے وزیراعظم کاسٹاس کرامینلس سے بھی ملنے والے ہیں۔

مسٹر روخے نے کہا کہ ایتھنز میں اولمپکس منعقد ہونا ایک خواب کی مانند ہے جو دنیا بھر کے کھلاڑیوں نے کسی نہ کسی وقت دیکھا ہے۔

منگل کو یونان کے وزیراعظم نے کہا تھا کہ وہ مطمئن ہیں کہ ایتھنز اولمپکس کے لیے تیار ہے۔

انہوں نے کہا کہ یونان نے اولمپکس کو کامیاب اور محفوظ بنانے کی پوری کوشش کی ہےاور خصوصی حفاظتی اقدام اٹھائے ہیں۔

القاعدہ کی طرف سے حملوں کے امکان کی وجہ سے سیکیورٹی کے لیے ایتھنز کے چاروں طرف درجنوں پیٹریاٹ میزائل نصب کر دیے گئے ہیں۔ طیارہ شکن پیٹریاٹ میزائل کے علاوہ ایتھنز کے ارد گرد سینکڑوں سیکیورٹی کیمرے لگائے گئے ہیں۔

یہ میزائل اور طیارہ شکن دیگرسیکیورٹی آلات یونان کے دوسرے شہروں میں بھی نصب کیے گئے ہیں۔

اولمپک گیمز کی سیکیورٹی پر ایک بلین ڈالر صرف کیے جا رہے ہیں جو اولمپکس کی تاریخ میں سیکیورٹی پر خرچ کی جانیوالی سب سے بڑی رقم ہے۔