ان انتخابات میں انتہائی سخت سیکورٹی انتظامات کیئے گئے ہیں

ان انتخابات میں بنگلہ دیش میں روائتی طور پر سیاسی حریف رہنے والی جماعتوں، شیخ حسینہ واجد کی عوامی لیگ اور خالد ضیاء کی نیشنلسٹ پارٹی کے درمیان مقابلہ ہے۔

ان دونوں سیاسی جماعتوں نے اپنی انتخابی مہم میں مہنگائی کم کرنے، کرپشن اور دہشت گردی کو ختم کرنے کے بلند بانگ انتخابی وعدے کیئے ہیں۔

فوجی کی زیر نگرانی قائم حکومت نے کہا ہے کہ اس نے ملک کی تاریخ میں پرامن اور شفاف انتخابات کے انعقاد کے لیے تمام ضروری اقدامات کر لیے ہیں۔

ان اقدامات کو پرامن اور شفاف طریقے سے کرانے کے لیے حکومت نے چھ لاکھ پولیس اہلکار اور ہزاروں کی تعداد میں فوجی تعینات کیئے ہیں۔

ہفتے کی رات کو اپنی نشری تقاریر میں شیخ حسینہ واجد اور خالد ضیاء نے محاذ آرائی، ہڑتالوں اور پرتشدد جلوسوں اور جلسوں کی سیاست کو ختم کرنے کا عہد کیا۔ بنگلہ دیش میں جمہوریت ایک عرصے تک محاذ آرائی اور پرتشدد سیاست کا شکار رہی ہے۔

سن دو ہزار چھ سے قبل پندرہ برسوں میں یہ دونوں رہنما یک بعد دیگرے اقتدار میں رہی ہیں۔

بنگہ دیش میں جنوری سن دو ہزار سات میں الیکشن منعقد ہونا تھے لیکن کئی ماہ کے پر تشدد مظاہروں کے بعد فوج نے ایک نگران حکومت قائم کرکے انتخابات ملتوی کر دیئے۔