عالمی برادری فلسطین اور اسرائیل کو مذاکرات کے راستے پر لے جائے

اتوار کو دعائیہ تقریب میں انہوں نے کہا کہ تشدد کی ہر شکل میں مذمت کی جانی چاہیے اور غزہ میں جنگ بندی بحال ہونی چاہیے۔پوپ نے عالمی برادری سے اپیل کی کہ وہ اسرائیل اور فلسطینیوں کے درمیان موجودہ مسئلے کا حل نکالنے میں ہر ممکن مدد کرے اور انہیں مذاکرات کے راستے پر لے جائے۔

برطانوی وزیِراعظم گورڈن براؤن نے کہا ہے کہ وہ غزہ میں اسرائیلی حملوں میں سینکڑوں افراد کی ہلاکتوں سے ’شدید تشویش‘ میں مبتلا ہیں۔برطانوی وزیِراعظم نے فلسطینی شدت پسندوں سے اپیل کی ہے کہ وہ اسرائیل پر راکٹ حملے بند کردیں اور اسرائیل سے کہا کہ وہ ’شہریوں کی ہلاکتوں سے گریز کرے‘۔

کنزرویٹو رہنما ڈیوڈ کیمرون نے اسے’خوفناک تشدد‘ قرار دیتے ہوئے کہا کہ دونوں فریق ’تحمل‘ سے کام لیں۔

دنیا بھر نے اسرائیل پر زور دیا ہے کہ وہ اس طرح کے حملوں سے گریز کرے۔

امریکہ نے اسرائیل سے کہا ہے کہ وہ حماس کو نشانہ بناتے ہوئے شہری ہلاکتوں سے گریز کرے۔

وائٹ ہاؤس نے حماس سے کہا ہے کہ وہ اگر فلسطین کے مستقبل میں کوئی کردار ادا کرنا چاہتا ہے تو وہ اپنی ’دہشت گردانہ‘ کارروائیوں کو روکے۔

دوسری طرف عرب لیگ کے سربراہ امر موسیٰ نے غزہ کے بحران پر بات چیت کے لیے عرب وزرائے خارجہ کا ہنگامی اجلاس طلب کیا ہے۔

فرانس کے صدر نکولا سرکوزی نے بھی کہا ہے کہ فلسطینی اسرائیلی علاقوں میں راکٹ پھینکنا بند کر دیں اور اسرائیل غزہ کی پٹی پر فضائی حملے بند کر دے۔

کل برطانیہ کی وزارتِ خارجہ نے اپنے ایک بیان میں اسرائیل اور فلسطینیوں سے کہا تھا کہ وہ اپنے اختلافات کو پر امن طریقے سے دور کریں۔