عرب لیگ نے عرب وزرائے خارجہ کا ہنگامی اجلاس طلب کر لیا ہے

امریکہ نے اسرائیل سے کہا ہے کہ وہ حماس کو نشانہ بناتے ہوئے شہری ہلاکتوں سے گریز کرے۔

وائٹ ہاؤس نے حماس سے کہا ہے کہ وہ اگر فلسطین کے مستقبل میں کوئی کردار ادا کرنا چاہتا ہے تو وہ اپنی ’دہشت گردانہ‘ کارروائیوں کو روکے۔

دوسری طرف عرب لیگ کے سربراہ امر موسیٰ نے غزہ کے بحران پر بات چیت کے لیے عرب وزرائے خارجہ کا ہنگامی اجلاس طلب کیا ہے۔

فرانس کے صدر نکولس سرکوزی نے بھی کہا ہے کہ فلسطینی اسرائیلی علاقوں میں راکٹ پھینکنا بند کر دیں اور اسرائیل غزہ کی پٹی پر فضائی حملے بند کر دے۔

برطانیہ کی وزارتِ خارجہ نے اپنے ایک بیان میں اسرائیل اور فلسطینیوں سے کہا ہے کہ وہ اپنے اختلافات کو پر امن طریقے سے دور کریں۔

برطانوی حکومت نے غزہ میں ہلاکتوں پر سخت تشویش کا اظہار کیا ہے۔

وزارتِ خارجہ کے ترجمان نے کہا ہے کہ ’جہاں ہم اسرائیل کی اپنے شہریوں کو تحفظ فراہم کرنے کی ذمہ داری سمجھتے ہیں وہیں ہم اس سے یہ مطالبہ کرتے ہیں کہ مزید شہری ہلاکتیں روکنے کے لیے حتی الامکان صبروتحمل کا مظاہرہ کرے۔