حالیہ جنگوں میں نجی کمپنیوں کا کردار سامنے آیا ہے

امریکی ذرائع ابلاغ کے مطابق وزارت خارجہ کی اس رپورٹ کے بعد اس بات کی قیاس آرائی شروع ہوگئی ہے کہ متنازعہ نجی سکیورٹی کمپنی بلیک واٹر کی لائسنس منسوخ ہوجائے گی۔

وزیر خارجہ کونڈولیزا رائس نے یہ رپورٹ اس واقعے کے بعد طلب کی تھی جس میں بلیک واٹر کے گارڈز نے سترہ عراقی شہریوں کو ہلاک کردیا تھا۔ بلیک واٹر کے پانچ محافظوں پر مقدمہ چلایا جارہا ہے۔

خبررساں ادارے اے پی کے مطابق وزارت خارجہ کی رپورٹ میں کہا گیا ہے کہ عراق میں امریکی سفارتکاروں کے تحفظ کے لیے بلیک واٹر کو دی جانے والی لائسنس دوبارہ نہ جاری کی جائے۔

تاہم لائسنس منسوخ کرنے سے متعلق حتمی تجویز پر غور اسی وقت ہوگا جب عراقی شہریوں کی ہلاکت کی تحقیاقت مکمل کرلی جاتی ہے۔

بلیک واٹر شمالی کیرولائنا کی ایک نجی سکیورٹی کمپنی ہے جسے عراق میں امریکی قبضے کے فوری بعد یہ ٹھیکہ دیا گیا تھا کہ وہ امریکی سفارتکاروں کو تحفظ فراہم کرے۔

بلیک واٹر دیگر ممالک کے سفارتکاروں کو بھی تحفظ فراہم کرتی ہے۔ لیکن ستمبر دو ہزار سات میں عراق شہریوں کی بلیک واٹر کے گارڈز کے ہاتھوں ہلاکت کے بعد یہ کمپنی متنازعہ بن گئی ہے۔