جوس لوئی نذاریو کا کہنا ہے کہ انہیں اپنی ٹرینگ کے تحت ڈیوٹی کرنے کی سزا دی جارہی ہے۔

28 سالہ امریکی فوجی جوس لوئی نذاریو نے 2004 میں دانستہ طور پر 4 عراقیوں پر تشدد کرنے اور انہیں ہلاک کرنے کے الزام سے انکار کیا ہے۔

بحریہ کے دستاویزات کے مطابق کئی امریکی فوجیوں نے نذاریو پر الزام عائد کیا تھا کہ انہوں نے اپنی ڈیوٹی پر رہتے ہوئے حراست میں لیے گئے دو عراقیوں کواس وقت مارا تھا جب کے انکے ساتھی گھروں کی تلاشی لے رہے تھے۔

ان پر یہ بھی الزام ہے کہ انہوں نے اپنے دو ديگر ساتھیوں کو دو غیر مسلح عراقیوں کو مارنے کا حکم بھی دیا تھا۔

بی بی سی کے نامہ نگار راجیش میرچندانی کا کہنا ہے کہ قانونی ماہرین کے مطابق اب سوال یہ اٹھتا ہے کہ اگر کوئی فوجی ڈیوٹی پر رہتے ہوئے قانون کی خلاف ورزی کرتا ہے تو انہیں کیا سزا دی جائے اور کس طرح سےانصاف کیا جائے۔

نذاریو پہلے امریکی فوجی ہیں جو اپنے عہدے پر برقرار نہیں ہیں اور اسکے باوجود ان پر مقدمہ چلایا جارہا ہے۔

نذاریو نے 2006 کو اپنا عہدہ چھوڑا تھا اور اگر وہ اس معاملے میں قصوروار پائے جاتے ہیں تو انہیں دس برس تک کی قید ہوسکتی ہے۔

اس مقدمے کے لیے جیوری کا انتخاب منگل کو شروع ہوا تھا اور ان کی جانب سے کوئی بیان ہفتے کے آخر تک آنے کی امید ہے۔

اسی طرح کے ایک اور معاملے میں دو ديگر فوجیوں کے خلاف مقدمہ سال کے آخر میں فوجی عدالت میں شروع ہونے کی امید ہے۔

ایک انٹریو میں نذاریو نے کہا ہے کہ انہیں جو تربیت دی گئی تھی اسکا استعمال کرنے پر انہیں سزا دی جارہی ہے۔

یہ مبینہ واقعہ 2004 میں اس وقت پیش آیا تھا جب امریکی فوجی فلوجہ پر قبضہ کرنے کے لیے برسر پیکار تھے۔