امریکہ کی کئی بڑی کمپنیوں نے ملازمین کو فارغ کیا ہے

انیس سو پچاس میں بڑے پیمانے پر اس وقت سرمایہ کاری کی گئی تھی جب امریکہ میں شاہراہوں کا نظام بنایا گیا تھا۔

نو منتخب امریکی صدر نے اس اعلان کے لیے اپنے ہفتہ وار خطاب کو استعمال کیا اور کہا کہ یہ تعمیری سرگرمیاں ان کے اس پلان کا حصہ ہوں گی جس کے تحت وہ امریکی معیشت میں پچیس لاکھ نئی ملازمتیں پیدا کرنا چاہتے ہیں۔

انہوں نے اس خطاب میں وسیع تر اور تیز رفتار انٹرنیٹ کی بات بھی کی اور سکولوں کی عمارتوں کو جدید بنانے کا ارادہ بھی ظاہر کیا۔

امریکہ میں صرف نومبر کے دوران ہی پانچ لاکھ سے زائد لوگ بے روز گار ہوئے ہیں۔

انیس سو چوہتر کے بعد یہ پہلا موقع ہے کہ بے روزگاری کی شرح چھ اعشاریہ سات کی اونچی حد تک پہنچی ہے۔ اسی سال اکتوبر میں یہ شرح چھ اعشاریہ پانچ تھی۔

یہ اعداد و شمار اس وقت سامنے آئے ہیں جب امریکی نیشن بیورو آف اکنامک ریسرچ نے یہ انکشاف کیا ہے کہ امریکی معیشت دو ہزار سات ہی سے کساد بازاری کی شکار ہے۔

مسٹر اوباما جو بیس جنوری کو اقتدار سنبھالیں گے، پہلے ہی اس بات کا اعلان کر چکے ہیں کہ ان کی ٹیم دو ہزار گیارہ تک پچیس لاکھ نئی ملازمتیں پیدا کرنے کی کوشش کرے گی۔

’ ہم آپ کا بیش قیمت پیسہ، جو آپ ٹیکس شکل میں دیتے ہیں، نئے اور زیادہ موثر انداز میں خرچ کریں گے۔اور ہم ریاستوں سے صاف طور پر کہیں گے کہ اس پیسے کو استعمال کرو ورنہ یہ رقم واپس لے لی جائے گی۔‘

مسٹر اوباما نے یہ بھی کہا کہ امریکی حکومت ایندھن پر دنیا میں سب سے زیادہ پیسہ خرچ کرتی ہے، اور ’ ہمیں یہ رجحان بدلنا ہوگا۔‘