امریکہ کا کہنا ہے کہ گوانتانامو کا قید خانہ بہترین انداز میں چلایا جا رہا ہے

پنٹاگون میں صحافیوں سے گفتگو کرتے ہوئے امریکی وزیرِ دفاع کا کہنا تھا کہ یہ قید خانہ اب دنیا میں بہترین انداز میں چلائے جانے والے قید خانوں میں سے ایک ہے۔

تاہم انہوں نے کہا کہ گوانتانامو کا قید خانہ اتنا رسوا ہو گیا ہے کہ یہ امریکہ کے گلے پڑا ہوا ہے۔

دریں اثنا امریکی حکام نے اس قید خانے کے پانچ مکینوں کے خلاف جنگی جرائم کے الزامات ختم کر دیئے ہیں۔

جن قیدیوں کے خلاف الزامات ختم کیے گئے ہیں ان میں نور عثمان محمد، بنیامین محمد، سفیان برہومی، عبداللہ الشرابی اور جبران سعد بن قحتانی شامل ہیں۔

الزامات ختم کرنے کی کوئی وجہ نہیں بتائی گئی لیکن ایک فوجی ترجمان نے بتایا کہ مشتبہ افراد کے خلاف نئے الزامات مرتب کیے جا سکتے ہیں۔

گزشتہ ماہ ان مقدمات سے منسلک استغاثہ کے وکیل نے اپنے ہی دفتر کے امور پر تنقید کرتے ہوئے استعفٰی دے دیا تھا۔

امریکہ نے یہ بھی تصدیق کی ہے کہ یہ قید خانہ اس وقت تک بند نہیں ہوگا جبتک کہ جنوری میں صدر بش نئے صدر کے حلف کے بعد عہدۂ صدارات سے الگ نہیں ہوتے۔

بش انتظامیہ کا موقف یہ رہا ہے کہ گوانتا نامو کا قید خانہ دہشت گردی کے خلاف جنگ میں اہم ہتھیار ہے۔

لیکن ناقدین کہتے ہیں کہ قانونی اسقام کی وجہ سے مشتبہ افراد کے ساتھ زیادتیاں کی گئی ہیں۔

امریکہ میں موجودہ انتخابی دوڑ میں شامل امیدوار جان میکین اور باراک اوباما کہتے ہیں کہ وہ گوانتانامو کا قید خانہ بند کرنا چاہتے ہیں۔