جاری تنازع کے دوران امدادی کام کرنے والے اداروں کو اکثر نشانہ بنایا جاتا ہے

ہلاکتوں پر مشتمل یہ واقعہ کابل سے ملحق صوبے میں پیش آیا۔ ہلاک ہونے والی خواتین کا تعلق امریکہ کینیڈا اور آئر لینڈ سے تھا اور وہ انٹرنیشل ریسکیو کمیٹی کے لیے کام کرتی تھیں۔

اس دوران ایک اور افغان اس وقت زخمی ہو گیا جب صوبہ لوگر میں دو کاروں میں سوار ایک قافلے پر نامعلوم افراد نے فائرنگ کر دی۔

افعانستان میں جاری تنازع کے دوران امدادی کام کرنے والے اداروں کو اکثر نشانہ بنایا جاتا ہے۔ کبھی ان کے قافلوں پر حملہ کیا جاتا ہے اور کبھی ان کے عملے کو اغوا اور ہلاک کر دیا جاتا ہے۔

جنوبی افغانستان میں عدم سلامتی کی اس صورتِ حال کے باعث اکثر صوبوں میں امدادی اداروں کے کیے کام جاری رکھنا ناممکن ہو چکا ہے جب کہ تشدد مزید علاقوں میں پھیلتا جا رہا ہے۔

کابل کے جنوبی صوبہ لوگر کو اس سے پہلے مقابلتاً محفوظ تصور کیا جاتا ہے لیکن اب وہاں تشدد کے واقعات میں مسلسل اضافہ ہو رہا ہے۔

کابل میں بی بی سی کے نامہ نگار کا کہنا ہے کہ اقوام متحدہ نے اب لوگر کو ان صوبوں میں شامل کر دیا ہے جنہیں انتہائی خطرناک قرار دیا جا چکا ہے۔