عبدالحئی کاکڑ بی بی سی اردو ڈاٹ کام، پشاور

	افغان حکومت کے مطابق تین سو طالبان فرار ہوئے

افغان طالبان کے ترجمان قاری یوسف احمدی نے افغانستان کے ایک نامعلوم مقام سے بی بی سی کو فون پر بتایا کہ جمعہ کی شب قندھار جیل پر ہونے والی کارروائی کی منصوبہ بندی پہلے ہی سے کی گئی تھی جو کہ ان کی جانب سے ’عبرت‘ کے نام سے شروع کی جانے والی کارروائیوں کا حصہ تھی۔

قندھارجیل پر حملہ، 340 طالبان فرار

ان کے مطابق جیل سے فرار ہونے والے تقریباً چار سو طالبان کو کارروائی میں حصہ لینے والے ان کے ساتھیوں نے محفوظ مقامات تک پہنچا دیا ہے اور ابھی تک کسی کو بھی دوبارہ گرفتار نہیں کیا جاسکا ہے۔ان کے بقول’اس کارروائی میں جن ساتھیوں نے حصہ لیا تھا وہ اپنا سر ہتھیلی پر رکھ کر نکل گئے تھے اور ہمارے لیے خود بھی یہ بات باعث حیرت ہے کہ اس منصوبے کو کس کامیابی کے ساتھ اپنے انجام کو پہنچایا گیا۔‘

قاری یوسف کا مزید کہنا تھا کہ جیل کے داخلی دروازے میں ایک ٹینکر میں کیے جانے والے دھماکہ میں اٹھارہ سو کلو گرام آتش گیر مادے کا استعمال کیا گیا تھا۔ان کے مطابق جیل میں داخل ہوتے ہی لاؤڈ اسپیکروں پر قیدی طالبان کے لیے یہ اعلان کیا گیا کہ’چلو آزادی کی طرف چلو، ظالموں سے نجات کا وقت ختم ہوگیا ہے۔‘

قاری یوسف سے پوچھا گیا کہ فرار ہونے والے طالبان میں کوئی خاص کمانڈر یا رہنماء شامل ہے تو انہوں نے لاعلمی کا اظہار کرتے ہوئے کہا کہ سردست اس بارے میں اس لیے کچھ نہیں کہا جاسکتا کہ ہم نے سب سے پہلے انہیں محفوظ مقام پر پہنچانا تھا۔

تاہم انہوں نے کہا: ’ہمیں اس قسم کی غیرمصدقہ اطلاعات ملی ہیں کہ ان میں بعض ایسے طالبان جنگجو بھی شامل ہیں جنہیں قندھار کے گورنر نے مبینہ طور پر پھانسی کی سزا سنائی تھی۔‘

ان کے مطابق ’ قندھار جیل فوجی اڈہ اور دیگر اہم حکومتی دفاتر کے قریب واقع ہے اور طالبان نے اس قدر شدید اورمنظم انداز میں یہ کارروائی کی کہ قندھار کچھ دیر کے لیے طالبان کے کنٹرول میں چلا گیا تھا۔‘

انہوں نے مزید بتایا کہ افغانستان میں موجود افغا ن اور غیرملکی افواج کے خلاف طالبان آپریشن’ عبرت‘ کے نام سے شروع کی جانے والی کاروائیوں کے سلسلے میں مستقبل میں بھی اس قسم کے نئے عسکری حربوں کا استعمال کیا جائے گا۔