’کوئی عقلمند ملک آج کے دور میں ایٹمی ہتھیار بنانے میں دلچسپی نہیں رکھتا‘

انہوں نے آیت اللہ خمینی کی انیسویں برسی پر تقریر کرتے ہوئے کہا ’کوئی عقلمند ملک آج کے دور میں ایٹمی ہتھیار بنانے میں دلچسپی نہیں رکھتا۔ ایٹمی ہتھیار عقل کے منافی ہے۔‘

انہوں نے کہا کہ ایران کا ایٹمی پروگرام پر امن مقاصد کے لیے ہے اور ہم اس پروگرام کو جاری رکھیں گے۔ ’دشمنوں کی خواہش کے مترادف ایران ایٹمی توانائی حاصل کرے گا۔‘

انہوں نے تقریر میں امریکی صدر جارج بش پر تنقید کرتے ہوئے کہا کہ بش اور ان کی ٹیم ’دیوانوں‘ کی طرح حرکتیں کر رہے ہیں۔ ’کبھی وہ دھمکاتے ہیں، کبھی قتل کے احکامات دیتے ہیں ۔۔۔ اور کبھی مدد کی اپیل کرتے ہیں۔‘

ایران کے رہبر اعلیٰ آیت اللہ خامنائی کی یہ تقریر اس وقت آئی ہے جب ایٹمی ایجنسی آئی اے ای اے نے ایران سے مطالبہ کیا ہے کہ وہ ایجنسی کو اپنی ایٹمی منصوبہ بندی کی تمام تفصیلات سے آگاہ کرے۔

ایٹمی ایجنسی کی رپورٹ میں کہا گیا ہے کہ ایران کی مبینہ ایٹمی ہتھیاروں میں تحقیق پر اس کو تشویش ہے۔