ایران پر حملے کی صورت میں پورا آئی اے ای اے کا کام ناممکن ہو جائے گا: محمد البرادی

محمد البرادی نے یہ بیان ان اطلاعات پر دیا ہے کہ اسرائیل نےبظاہر ایران پر حملے کی ریہرسل کی ہے۔ اسرائیلی ہوائی جہازوں نے پندرہ سو کلو میٹر تک پرواز کی۔

اسرائیل اور مقام نطنز کے درمیان تقریباً اتنا ہی فاصلہ ہے جہاں یورینیم کی افزودگی کے کارخانے ہیں۔

امریکی محکمہ خارجہ نے اسرائیلی مشقوں پر کوئی تبصرہ نہیں کیا ہے۔ ایک ترجمان نے صرف اتنا کہا ہے کہ امریکہ کی توجہ ایران سے سفارت کاری پر ہے لیکن جتنی باتوں کا اختیار انہیں ہے وہ سب ان کے سامنے ہیں۔

اقوام متحدہ میں روسی سفیر نے خبردار کیا کہ ایران پر حملہ ہوا تو معاملہ کرنے کی ساری کوششوں پر پانی پھر جائے گا۔

ایران کے معاملے پر اسرائیلی حکام کہتے رہے ہیں کہ اگر عالمی برادری نے ایران کو جوہری پروگرام جاری رکھنے سے نہ روکا تو اسرائیل براہ راست اقدام کر سکتا ہے۔

واشنگٹن میں سفارت کاروں کا خیال ہے کہ اسرائیل کی تازہ مشقیں صرف دھونس دینے کے لیے تھیں کیونکہ اسرائیل نے اگر کبھی حملے کی نیت کی تو وہ پہلے سے خبردار تو نہیں کرے گا۔ اسرائیل اس سے پہلے عراق اور شام کے جوہری پروگراموں کو تباہ کر چکا ہے۔