دروز رہنما کے ہتھیار ڈالنے کے بعد لڑائی رک گئی

بیروت کے جنوب مشرقی پہاڑی علاقے الشويفات پر حزب اللہ کے ججنگوؤں نے بھاری اسلحہ سے حملہ کیا۔

بی بی سی کے نامہ نگار کے مطابق جب دروز افراد نے خونریزی سے بچنے کے لیے ہتھیار ڈال دیے تو تب ہی جا کر جنگ بندی ہوئی۔

اس سے قبل چار روز تک حزب اللہ کے حامیوں نے مغربی بیروت پر قبضہ کیے رکھا تھا اور یہ خدشہ ظاہر کیا جا رہا تھا کہ کہیں لبنان دوبارہ خانہ جنگی کی طرف نہ چلا جائے۔

اتوار کو بیروت میں قدرے خاموشی رہی جس کی بنیادی وجہ ان علاقوں کا کنٹرول فوج کے پاس واپس آنا تھا جن پر حزب اللہ نے چند روز قبل قبضہ کر لیا تھا۔ تاہم لبنان کے دوسرے بڑے شہر تریپولی میں حکومت اور اپوزیشن کے حامیوں کے درمیان گزشتہ شب جھڑپیں جاری رہیں جس میں اب تک تین افراد کی ہلاکت کی اطلاعات ہیں۔

	لبنانی فوج دروز اکثریت کے علاقوں کی طرف بڑھ رہی ہے

بی بی سی کے نامہ نگار کے مطابق لبنان کے دارالحکومت بیروت میں حکومت اور اپوزیشن کے حامیوں کے درمیان چار دن کی جھڑپوں میں اب تک تیس سے زائد افراد ہلاک ہو چکے ہیں۔

سنیچر کو فوج کی حکومت کی طرف سےحز ب اللہ کےخلاف کارروائی رکنے کے بعد جماعت نےشہر کے مسلم اکثریت والے مغربی حصے سے اپنے جنگجو واپس بلانے کا فیصلہ کرلیا تھا۔

خبر رساں ایجنسی اے ایف پی کو ایک سکیورٹی اہلکار نے نام ظاہر نہ کرنے کی کی شرط پر بتایا کہ لبنان میں مغرب نواز برسر اقتدار حکومت کے سنی حمایتی تریپولی میں حزب اللہ کے کارکنوں سے لڑ رہے ہیں جن کا تعلق علاوی فرقے سے ہے ۔

اہلکار نے مزید بتایا کہ اب تک لڑائی سے سب سے زیادہ متاثرہ قصبے باب التبنیہ کے تقریباً سات ہزار افراد نقل مکانی کر چکے ہیں۔