فرانسس ہیریسن بی بی سی نامہ نگار

	بحرین میں حائفہ کے شو پر پابندی کے لیے پارلیمان نے قرارداد منظور کی ہے

ملک کی پارلیمان نے کثرتِ رائے سے ایک قرارداد منظور کر کے اس پروگرام پر پابندی کا مطالبہ کیا ہے۔ حیفہ کے پروگرام پر پابندی کی اس قرارداد کی مخالفت میں خلاف صرف ایک قانون ساز رکن نے ووٹ دیا۔

پارلیمان کا خیال ہے کہ پاپ سپر سٹار حیفہ وہبی سٹیج پر اپنے ڈانس اور گانے سے لوگوں کے جذبات بھڑکائیں گی اور ان کے شو سے اسلامی روایات اور بحرین کی اقدار کی خلاف ورزی ہوگی۔ یاد رہے کہ اس شو کے منتظمین نے وعدہ کیا تھا کہ حیفہ ’اشتعال انگیز‘ لباس نہیں پہنیں گی لیکن اراکین پارلیمان کے لیے یہ یقین دہانی کافی ثابت نہیں ہوئی۔

ماضی میں بھی حیفہ پر غیر شائستہ رقص کا الزام لگایا جاتا رہا ہے اور بعض اخبارات نے ان کے رقص پر تبصرہ کرتے ہوئے یہاں تک کہہ دیا تھا کہ وہ اپنے نیم عریاں جسم کے ہر عضو کو متحرک کرنے پر قادر ہیں۔ حتٰی کہ وہ اعضا بھی جو عضلات سے محروم سمجھے جاتے ہیں۔ ایک رکنِ پارلیمان کا کہنا ہے کہ حیفہ اپنے گلے سے نہیں بلکہ اپنے بدن سے سُر نکالتی ہیں۔

بحرین میں چار سال قبل بھی اراکین پارلیمنٹ نے برطانوی سیریز ’بگ برادر‘ کی طرز پر عربی میں بنائے جانے والے ایک پروگرام پر پابندی لگا دی تھی کیونکہ ان کے خیال میں یہ پروگرام ’عرب اقدار اور روایات کے خلاف تھا‘۔

رقص کا انداز  ان کے انداز رقص پر اخبارات میں بھی تنقید ہوئی ہے۔ ان کے ’اشتعال انگیز‘ رقص کے بارے میں ایک اخبار نے لکھا کہ وہ اپنے جسم کا ہر حصہ ہلاتی ہیں، وہ اعضا بھی جن میں عضلات بھی نہیں ہوتے

حیفہ وہبی اپنے مخصوص انداز کے لیے مشہور ہیں۔ مردوں کے لیے مخصوص ویب سائٹ آسک مین ڈاٹ کام پر جب سب سے زیادہ پسندیدہ خواتین کی فہرست ترتیب دی گئی تو ان کا نام کافی اوپر تھا۔ اس کے علاوہ وہ پیپلز میگزین کی حسین ترین خواتین کی فہرست میں بھی شامل تھیں۔

حیفہ نے اپنے کیرئیر کا آغاز سولہ سال کی عمر میں اس وقت کیا تھا جب وہ ایک مقابلۂ حسن میں مس جنوبی لبنان منتخب ہوئیں۔اب وہ ایک کامیاب فیشن ماڈل ہیں۔ وہ اپنے گانوں کی تین البم جاری کر چکی ہیں اور ٹی وی پر ان کے پروگرام تواتر سے آتے رہتے ہیں۔ حیفہ مشرق وسطی میں تو بہت مشہور ہیں لیکن عرب دنیا سے باہر انہیں زیادہ لوگ نہیں جانتے۔